DILI, STLTIMORLESTE.com – Xefe Estadu Maior Jenerál FALINTIL – Forsa Defeza Timor Leste (F–FDTL), Tenente Jenerál Domingos Raúl “Falur Rate Laek” hatete, ohin F–FDTL dahuluk halao Ezersísiu Kombinasaun Armas–25, ida nee atividade krusial ida neebe atu hasae sira nia kapasidade operasionál hodi hasoru anin fuik no laloran siak neebe sei mai, F-FDTL prontu hasoru iha futuru.
“Konseitu Kombinasaun Armas nee fundamental bá ita nia treinamentu militár, tanba nee liu-husi ezersísiu ida nee imi sei hadia imi nia efikasia iha situasaun kombate no aumenta imi nia protidaun no respeita ba kualkér dezafiu neebe ita hasoru oin mai,” hatete Xefe Estadu Maior Jenerál F-FDTL, Tenente Jenerál Domingos Raúl “Falur Rate Laek” ba jornalista sira liu husi nia diskursu wainhira halo abertura ba serimónia trenamentu Kombinasaun Armas-25 iha Komponente Naval Hera, Segunda (14/07/2025).
Nia dehan, imi sei halao ezersísiu sira nee ho senariu pratika ho kolaborasaun hodi hadia imi nia abilidade ba oin nee importante tebes, tanba imi hotu nafatin aprende ba malu no troka ba malu.
“Hau agradese ba esforsu hotu-hotu no inisiativa neebe imi dezenvolve ba Instituisaun FALINTIL-FDTL hahu inisiu too ohin loron, hau husu ba imi, imi nia kompromisu no misaun Defeza neebe imi kontribui ba ita nia soberania, tanba ba futuru ameasa no dezafiu sira sei iha, tanba nee imi tenke treinamentu kosntante no formasaun no rekursu umanu ne’e importante,” nia esplika.
Nia tenik, determinante mak elementu umanu, tanba nee militar nia formulasaun importante hanesan Ezersísiu dahuluk neebe Instituisaun F-FDTL halao, tanba nee Instituisaun F-FDTL prontu hasoru anin fuik no laloran siak ne’ebé sei mai F-FDTL Prontu hasoru.
“Hau husu ba Komponente hotu-hotu nomos Unidade hotu-hotu imi hadia imi nia kapasidade de kombate liu-husi treinamentu, maibe imi mos tenke hadia imi nia komportamentu pesoal atu ita bele responde ba ameasa oin-oin neebe ohin loron akontese no ba futuru wainhira ema nasaun ruma hanoin aat karik kuidadu asu siak iha Timor Leste,” nia deklara.
Iha fatin hanesan, Komandante Komponente Naval, Comodoru Higino das Neves informa, ezersísiu Kombinasaun Armas foin dahuluk F-FDTL halao husi Komponente tolu (3) mak hanesan Komponente Forsa Terestrre, Komponente Naval no Komponente Aérea Lijeira inklui mos Unidade Polísia Militár (PM) no Unidade FALINTIL (UF).
“Ita nia forsa kiik maibe ita presiza forsa ida nee tenke hatene oinsa servisu hamutuk, tanba Ezersísiu Kombinasaun Armas nee Ezersísiu Operasional, tanba nee mak Ezersísiu ne’e sei iha tiru atu nune’e sira bele fahe esperiénsia no konhesimentu ba malu, atu ba futuru Komandante pelotaun iha ona kapasidade atu fo ordem ba membru sira oinsa sira bele ezekuta no servisu hamutuk,” nia ko’alia.
Comodoru hatutan, objetivu prinsipál Ezersísiu Kombinasaun Armas nee oinsa atu servisu hamutuk tiru Armas iha terenu.
“Tanba nee Komando husu atu utiliza tempu ho diak hodi imi bele halao buat neebe imi nia instrutór hanorin iha terenu,” nia afirma.
(jen)
