DILI, STLTIMORLESTE.com – Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Jeneral Domingos Raul “Falur Rate Laek” hatete, Papa Francisco nuudar figura neebe lori Timor Leste (TL) ba iha mapa mundu nian.
Nia dehan, ho vizita Sua Santidade Papa Francisco mai Timor Leste nuudar vizita despedida ida entre Papa Francisco ho povu Timor Leste no vizita Papa nian nee hodi komprova katak, Timor Leste iha fee neebe boot tebes. Tanba ho falesimentu Papa Francisco nee, Timor Leste sente lakon tebes ema ida hanesan Papa Francisco.
“Sua Santidade Papa nee mai tau ita iha mapa mundu nian. Komprova katak, ita nee iha fee no devosaun. Nia mai nee hanesan ultima despedida ba ita. Nia ita nia xefe supremu, ita sente laran susar, maibe en fim vida mak ida nee nia iha ona, Maromak nia fatin neeba tanba ninian pureza da alma. Neebe ita hein katak, nia bele harohan ba ita nafatin,” dehan Tenente Jeneral Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Sesta (25/04/2025).
Nia esplika, Timor Leste presiza fo omenajen ba falesimentu Sua Santidade Papa Francisco, tanba nuudar lider supremu igreja Katolika iha mundu.
“Tanba ita haree iha nia (Papa Francisco) mesajen ikus katak, nia fuan hela ho ita. Tanba nee ita haree iha fatin hotu-hotu sunu lilin no reza ba sua Santidade Papa Francisco no nia autoridade masimu ita nia relijiaun nian ita laran susar maibe ida nee mak fim husi moris,” nia deklara.
Xefe Estadu Maiór Jeneral nee espera katak, Sua Santidade Papa foun mai bele kontinua halo saida mak Sua Santidade Papa Francisco halo ona hodi kontinua sai bibi atan neebe diak hodi servi ba nia sarani sira iha mundu tomak. Hein katak, Papa foub neebe mai servi nafatin nia sarani sira iha mundu tomak,” nia hatutan.
Iha fatin ketak, Amu Paroku Imaculada Conceição da Virgem Santa Maria, Padre Paulus Maya esplika, Sua Santidade Papa Francisco vizita Timor Leste durante loron tolu nia laran, hahu husi loron 9-11 Setembru 2024, tanba nee ninia prezensa iha TL seidauk lakon husi Timor nia memoria, basa ita nia sentimentu sei lasu uda metin ho Amu Papa.
“Papa Francisco nia prezensa iha TL seidauk lakon husi Ita Timoroan ninia Memoria, ita Timor nia sentimentu tanba ita sei lasu ida metin ho Amu Papa Francisco, tanba nia mai vizita ita nia rain, Amu Papa Francisco ema hanaran Papa povu nian,” dehan Padre Paulus.
(jen)
