DILI, STLTIMORLESTE.com – Xefe Estadu Maior Jeneral Forsa Armada, Tenente Jeneral Domingos Raul Falur Rate Laek hato’o agradese ba forsa husi nasaun 22 neebe lidera husi Australia involve iha misaun International Force East Timor (INTERFET) ho susesu liu husi intervensaun internasional neebe aprova husi Organizasaun Nasoens Unidas (ONU).
“Iha fulan Setembru 1999, bainhira forsa INTERFET sira tun, sira laos lori deit seguransa imediata, maibe mos promesa tanjivel kona ba futuru soberanu rai ida nian. Prezensa no partisipasaun nasaun 22 nian iha INTERFET, ezemplu ida neebe susesu liu husi intervensaun internasional neebe aprova husi ONU,” hatete Tenente Jeneral Falur Rate Laek iha serimonia enseramentu ba Ezersisiu Indo-Pasifiku Endeavour 2025 no selebrasaun ba INTERFET nia aniversariu ba dala 26 (20 setembru 1999-20 setembru 2025) iha Kampu Futsal, Fatuhada, Dili, Sabadu (20/9/2025).
Nia dehan, semana ida ho atividade intensa reprezenta buat bark duke ezersisiu militar simples ida. Ida nee mak afirmasaun husi parseira entre nasaun soberanu sira neebe unidu husi respeitu ba malu no valor sira neebe komun.
“Ida nee mos reprezenta omenajen ida neebe dignu ba sira neebe iha tinan 26 liuba hatan ba apelu ba pas iha momentu krusial ida iha istoria Timor Leste nian,” tenik Jeneral Falur Rate Laek.
Iha oportunidade ida nee, Jeneral Falur Rate Laek hato’o agradesementu boot Timor Leste nian ba veteranu INTERFET sira nia servisu iha momentu kritiku iha Timor Leste nia istoria.
“Ami sei la haluha servisu INTERFET nian iha momentu kritiku iha ami nia istoria,” hatete Jeneral Falur Rate Laek.
Nia mos haktuir katak durante tinan 26 nia laran, INTERFET hatudu kbiit transformativa kooperasaun internasional nian bainhira hetan orientasaun husi prinsipiu justu sira.
“Ohin Indo-Pacific Endeavour 2025, hafoun fali kompromisu ida nee, laos hanesan reminisensia ida ba pasadu, maibe hanesan vizaun ida ba futuru. Hein katak espiritu parseiria, respeitu no kompromisu ba dame nee karakteriza eventu ida nee kontinua inspira ita nia relasaun bilateral no multilateral iha tinan sira tuir mai,” hatete Falur.
Tenente Jeneral Falur mos hato’o agredese ba delegasaun Australia, ba profesionalismu no dedikasaun neebe hatudu durante ezersisiu ida nee.
“Ba militar F-FDTL sira, hau espresa hau nia orgullu ba maneira ezemplar neebe imi reprezenta ita nia nasaun no ba imi nia kompromisiu atu absorve konhesementu neebe sei hametin ita nia kapasidade operasional sira. Ba ekipa lojistika no planeamentu sira, hau rekonhese ita boot sira nia servisu hodi organiza eventu kompleksu ida nee,” katak Jeneral Falur.
Serimonia enseramentu ba Ezersisiu Indo-Pasifiku Endeavour 2025 no selebrasaun ba INTERFET nia aniversariu ba dala 26 nee ho jogu amizade Futsal entre forsa feto husi F-FDTL no Australia neebe halao iha Kampu Futsal F-FDTL Fatuhada.
Jogu amizade nee espesiamente abertura husi Xefe Estadu Maior Jeneral Forsa Armada, Tenente Jeneral Domingos Raul Falur Rate Laek akompanhia husi Embaixadora Australia ba Timor Leste, Caitlin Wilson ho tebe bola futsal dahuluk.
Hafoin nee, kontinua jogu futebol entre forsa mane F-FDTL no Australia iha Estadiu Munisipal Dili. Prezidente Republika, Jose Ramos Horta marka prezensa iha jogu amizade forsa F-FDTL no Australia.
Jornalista: Mikael Mali Mau
Editor: Mikael Mali Mau
