DILI, STLTIMORLESTE.com – Xefe Estadu Maior Jenerál FALINTIL – Forsa Defeza Timor Leste (F-FDTL), Tenente Jenerál Domingos Raul “Falur Rate Laek” partisipa seminariu estudante Instituto Ciencia Saude (ICS) no sai orador ba estudantes ICS kona-ba liderasa no nasionalizmu.
Nia dehan, tema neebe mak Tenente Jenerál Falur Rate Laek lori mak “Transforma Juventude Akademiku nian Pensamentu kona-ba Liderasan no Nasionalizmu.
“Hau hakarak agradese ba parte hotu-hotu husi ICS nian bele konvida hau, atu mai halo palestra ba estudantes foun sira, se hau la sala hau mai iha nee dala rua ona neebe hakarak agradese ba opurtunidade ida nee,” hatete Xefe Estadu Maior Jenerál FALINTIL – Forsa Defeza Timor Leste (F-FDTL) Tenente Jenerál Domingos Raúl “Falur Rate Laek” ba jornalista sira iha ICS Komoro, Díli, Sabadu (01/03/2025).
Nia hatete, obrigadu ba konvite hodi mai iha nee atu fo seminariu ba estudante sira iha asuntu rua deit, mak hanesan lideransa no nasionalizmu, aspetu importante rua nee mak liga ho foinsae sira ita nia prosesu harii nasaun ho estadu
“Laiha duvida katak, foinsae sira mak jerasaun tuir mai, nasaun nia futuru lider nasaun nian iha jerasaun foun sira nia liman, nee duni husu ba ita boot sira estuda didiak hodi lori nasaun nee bá futuru sai nabilan no furak diak liu tan,” nia tenik.
Iha fatin hanesan, Estudante ICS, Duartina Ximenes informa, seminariu ida nee importante tebes ba sira, tanba hetan materia foun husi Xefe Estadu Maior Jenerál FALINTIL-Forsa Defeza Timor Leste (F-FDTL) Tenente Jenerál Domingos Raúl “Falur Rate Laek” kona-ba oinsá Transforma Juventude Akademiku nian Pensamentu konaba Liderasan no Nasionalizmu.
“Oinsa atu transforma ami juventude akademiku nian pensamentu kona-ba liderasan no nasionalizmu ba povu no nasaun ida nee, materia ida nee hanesan bukae ida atu uza iha ami nia futuru aban bairua nian, tanba nasaun ida nee presiza ema matenek hodi dezenvolve raí ida nee ba oin,” nia afirma.
(jen)
