DILI, STLTIMORLESTE.com – Xefe Estadu Maiór Jeneral FALINTIL – Forsa Defeza Timor Leste (F-FDTL), Tenente Jenerál Domingos Raul “Falur Rate Laek” promete sei hadia mentalidade membru militar sira nia hodi evita kazu suisidiu no kazu adulteira iha instituisaun F-FDTL, labele halo arbiru hodi respeita ba regulamentu militar no repeita ba irarkia.
Lifuan nee Xefe Estadu Maiór Jenerál FALINTIL – Forsa Defeza Timor Leste (F-FDTL), Tenente Jenerál Domingos Raul “Falur Rate Laek” haktuir ba jornalista sira iha Palasiu Prezidente Nicolau Lobato, Bairo Pite, Kuarta (03/09/2025).
“Ba oin bainhira iha rekrutamentu ba kadetes membru F-FDTL sira tenke aplika mos teste psikolojia hodi bele hatene kona-ba membru sira ninia komportamentu nomos sira nia mentalidade sira no seluk tan. Ida nee tenke, tanba psikologo sira nee sei reforsa iha area hotu-hotu iha area espesial hotu, hodi hare hamutuk nunee kuandu sira tama iha militar komportamentu diak no mentalidade diak, nunee bele evita no prevene sira labele monu ba iha kazu sira neebe mak la espera akontese,” dehan Falur.
Nia rekonhese katak, membru F-FDTL neebe mak komete krimi suisidiu/tiru aan, nomos krimi adulteiru, tanba aplika sala lisaun sira neebe mak aprende ona, liu-liu regulamentu sira neebe aplika ona.
Nia esplika, loos duni iha instituisaun F-FDTL nee sempre mosu kazu hanesan suisidiu ou oho aan ho arma kilat hanesan akontese iha Oe-kusse foin lalais, nomos mosu tan adulteiru/selingkuh, maibe komandu sempre tau atensaun neebe rigorozu atu membru sira lao tuir regulamentu militar nian.
“Iha instituisaun F-FDTL nee ita rigor kedas ona, ita iha pensamentu neebe dok liu ona, ita evita sira halo hahalok sira nee, no agora lei mos iha tiha ona, agora ninia implementasaun nee mak problema. Ita iha ona lei regula komportamentu ema nian, pratika ema nian nee antes sira tama nee hanorin ona sira,” nia deklara.
Nia esplika, membru sira neebe mak komete krime suisidiu nomos adulteiru, tanba mai husi fator neebe kontribui mak karakter ema nian, tanba instituisaun F-FDTL eduka nanis ona membru militar sira.
Jornalista: Jeniche da Costa
Editora: Domingas Gomes
