DILI, STLTIMORLESTE.com – Relasiona ho kazu neebe viral iha media sosial katak, deskonfia membru FALINTIL-Forsa Defeza Timor Leste (F-FDTL) baku sidadaun ida iha Bobonaro, Xefe Estadu Maior Jeneral F-FDTL, Tenente Jenerál Domingos Raúl “Falur Rate Laek” seidauk simu relatoriu ofisial.
“Kazu Bobonaro relatoriu ofisial hau seidauk simu, hau seidauk lee,”hatete Xefe Estadu Maior Jeneral F-FDTL, Tenente Jenerál Domingos Raúl “Falur Rate Laek” ba jornalista sira iha Kuartel Jeneral F-FDTL Fatuhada, Kuarta (05/11/2025).
Nia dehan, iha loron finado Xefe Estadu Maior Jeneral F-FDTL, Tenente Jenerál Domingos Raúl “Falur Rate Laek” selebra mos finado no rona informasaun nee liu husi media sosial, maibe parte nia seidauk simu relatoriu.
“Hau mos loron boot ba neeba ema komesa posting, ema komesa koalia barak ona maibe relatoriu ofisial hau seidauk simu. Neebe hau hatene katak prosesu lao hela, Primeiru Ministru (PM) bolu ona para halo investigasaun para depois ita haree medida positiva saida maka halo nee ita sei fo sai depois iha justisa,” nia informa.
Nia deklara, kuandu violasaun grave ona, kuandu justisa desidi ona katak, membru F-FDTL nee ona, entaun tenke sai duni maibe sei liu prosesu naruk nomos sei halo investigasaun.
“Kuandu baku ona ran sai ona nee sala ona, maibe ita sei haree ninia kaman no todan justisa maka bele sukat, laos hau Komandante mak sukat los k lae,”nia koalia.
Entertantu tuir observasaun STL nian iha media sosial katak, iha pajina Facebook Epifania Kth dehan, membru F-FDTL foun ida ho kondisaun lanu mai hakilar sira neebe tur hakmatek iha uma laran, ho lian makas no hakilar sira tauk no halai, tanba tauk.
“Forsa foin sae ida kondisaun hakilar ami neebe ho familia tur iha uma laran tauk no halai, hau nia apa koko atu salva ami, maibe nia tama mai bodi baku hau nia apa ran sai. Hau oan senti triste tebes, tanba nee husu kazu nee tenke ba oin,” nia afirma.
Jornalista: Jeniche da Costa
Editora: Domingas Gomes
