BAUKAU, STLTIMORLESTE.com – Familia sira hetan ona Matebian Caetano de Almeida nia isin rohan iha area mota Afalita Kalauai entre Munisipiu Vikeke, Baukau no Lautem nia klaran.
Matebian Caetano de Almeida idade 58 lakon iha loron 03 Maiu 2025, pur volta tuku 10:00 dader, iha neebe matebian sai husi rezidensia Larisula ba natar iha area Suku Larisula, Postu Administrativu Baguia, Munisipiu Baukau, derepente tata husi Lafaek iha mota Larisula hodi lakon matebian nia isin.
Familia matebian, Jacinto Valdemar Gusmão haktuir, inisiu matebian nia isin lakon, parte familia hamutuk ho Autoridade Sivil no militar buka tuir matebian nia mate isin durante loron 10 nia laran, hafoin hetan iha loron 12 Maiu 2025, area mota Afalita Kalauai entre Munisipiu Vikeke, Baukau no Lautem
“Matebian Caetano de Almeida nia mate isin laos hetan kompletu, maibe hetan deit nia tee oan iha Afalita Kalauai nian, besik liu pertigaan irabere nian nia isin rohan nee belit hela ai-kakeu hun,” informa Jacinto Valdemar Gusmão ba jornalista sira liu husi telefone, Tersa (13/05/2025).
Familia nee konta, durante loron 10 buka tuir matebian Caetano de Almeida nia isin lolon ho tradisaun kultura, maibe hetan deit matebian nia isin rohan (tee oan), enkuantu orgaun isin lolon nian hanesan ruin la hetan, tanba deskonfia isin no ruin han ona husi lafaek.
Nia realsa, familia komprova katak, isin rohan (tee oan) neebe belit ai-kakeu hun iha area mota Afalita Kalauai, husi matebian nian isin rohan, tanba buka tuir ho tradisaun kultural.
“Sim ami identifika nia duni, ho tradisaun kulturalmente ami husu nee mak identifika lo-loos Caetano nia isin nee mak ami foti akompanha ho komunidade sira too iha uma,” Jacinto Valdemar Gusmão akresenta.
Entretantu daudaun matebian Caetano de Almeida nia isin rohan familia rai ona iha rezidensia Suku Larisula hodi haloot tuir kultura Timor nian.
(tom)
