BAUKAU, STLTIMORLESTE.com – Familia kbiit laek preokupa eskola publiku balu iha Postu Administrativu Baukau Vila, Munisipiu Baukau, kada fulan simu osan husi estudante sira.
Estudante nia Aman, Venancio Jorge de Sá preokupa eskola publiku sira hanesan Ensinu Baziku Filial Terseiru Siklu Kaibada Uaimua no Eskola Sekundaria Jeral 01 Tirilolo Baukau, tanba kada fulan estudante sira tenke kontribui ona ba eskola, hodi apoiu profesores voluntariu sira nia nesesidade.
Nia komenta, politika estudante apoiu kontribui osan ba eskola haterus komunidade kbiit laek sira, tanba balu moris depedente ho vida agrikultura laiha rendimentu atu sustenta ekonomia familia, maibe kada fulan tenke kontribui osan ba eskola, tanba oan sira nia futuru.
“Preokupasaun mak ba iha labarik sira eskola, ami moris agrikultor orsamentu nee tempu bailoron mak foin ami hetan osan oituan, iha tempu udan produtu lokal barak ba iha merkadu la folin, difikulta labarik eskola tanba sira ba eskola tenke lori osan eskola selu, SD, SMU, SMP mos selu hotu,” Venancio hateten ba jornalista sira, iha Uanioma Kaibada, Segunda (01/12/2025).
Nia sublina, eskola Ensinu Baziku Filial Terseiru Siklu Kaibada Uaimua kada fulan estudante ida selu US$ 3.00 no eskola Ensinu Sekundaria Jeral 01 Tirilolo kada fulan estudante ida US$ 2.00, enkuantu eskola Ensinu Baziku Primeiru Segundu Siklu Katolika Kaibada Uaimua kada fulan estudante ida seluk US$ 0.50.
Nia fundamenta, hanesan familia rendimentu menus sente preokupa ho politika eskola publiku neebe kada fulan estudante sira selu, maibe nuudar inan aman tenke koopera hodi kontribui nunee apoiu ba profesores voluntariu sira nia nesesidade.
“Atu saida mos ami tenke esforsu tanba ami hakarak ami nia oan, tenke eskola atu difikuldade todan mos ami tenke esforsu para sira mos tenke eskola,” Venancio akresenta.
Autoridade Lokal Kaibada Cosme da Costa Lopes agrasede ba apoiu inan aman nia kontribuisaun ba iha setor edukasaun, tanba kada fulan kontribui osan ba eskola hodi apoiu profesores voluntariu sira nia nesesidade, maibe parte seluk preokupa ho politika refere, tanba eskola publiku sira Ministeriu Edukasaun bandu, atu estudante sira kontribui osan ba eskola atu apoiu ba profesores voluntariu sira.
“Hau hanoin Diretor Munisipal liu liu ba iha Edukasaun loloos sira tenke toma atensaun ida nee, dala ruma mos iha karta despashu Ministra Edukasaun nian, neebe ita haree mos kondisoens atu nunee labele fo preojudika fila fali ba ita nia komunidade,” Cosme hateten .
Tuir Autoridade Suku Kaibada nee katak, prezisa Servisu Munisipal Edukasaun Baukau tau atensaun ba asuntu refere, tanba komunidade maioria moris ho vida agrikultura neebe difisil hetan rendimentu atu sustenta nesesidade ekonomia familia, maibe eskola publiku nafatin selu, nee prejudika tebes ba sira nia ekonomia familia.
Nia komenta, tuir loloos profesores voluntariu sira neebe kontinua eziste iha nivel eskola publiku sira Ministeriu Edukasaun tenke tau orsamentu, maibe kuandu laiha orsamentu lalika koloka profesores voluntariu iha nivel eskola.
Enkuantu Diretor Eskola Sekundaria Jeral 01 Tirilolo Baukau, Estevão Ximenes Gusmão rekonhese, eskola sekundaria jeral 01 Tirilolo Baukau kada fulan simu osan husi estudante sira hodi apoiu ba profesores voluntariu sira, tanba hetan aseitasaun husi estudante sira nia inan aman.
“Se inan aman nia oan ida deit mak eskola iha nee selu US$ 2.00, se inan aman ida oan nain 2 seluk US$ 1.50, se inan aman nia oan nain 3 kada ema ida US$ 1.00, nee konkordansia entre inan aman ho eskola,”nia esplika.
Nia komenta, parte eskola husu apoiu ba estudante sira la kontra dezisaun Ministeriu Edukasaun nian, tanba iha lei baze Edukasaun nian fo dalan ba estudante sekundaria sira atu kontribui osan ba eskola kada fulan la liu US$ 5.00.
Diretor eskola nee haklean liu tan, politika estudante sira kontribui ba eskola akontese, tanba iha tinan 2024 bainhira profesores kontratadu sira Ministeriu hapara estudante barak sai vitima, tanba lakon materia.
Nunee iha anu letivu 2025 inisiu prosssu aprendizajem hahu parte eskola konvoka reuniaun ho estudante nia inan aman, halo kontribusaun ba eskola hodi apoiu ba profesores voluntariu sira, nunee estudante sira labele lakon direitu ba materia.
Jornalista: Tomas Reis
Editora: Carme Ximenes
