DILI, STLTIMORLESTE.com – Familia husi Saudoza Etelvina Fernandes Belo “Bidoli Mau” no nia subrina Domingas Bi Unu Bulere Cartaiano nia ruin neebe durante nee haloot iha Semiteriu Santa Kruz, familia sira desidi atu kee sai.
“Durante nee nia laen no kaben atu rekolha nia ruin ba tau iha Jardim Herois, maibe hein too agora nia laen mate ona, nia familia desidi foti Saudoza nia ruin iha Santa Kruz, tau hamutuk iha Rezidensia Saudozu Komandante Maucalo nian, mak estadu no Governu atu tau iha fatin ida neebe estadu prepara ba mak iha Jardim Herois Metinaru,” dehan Martinho Soares da Silva ba jornalista sira iha Semiteriu Santa Kruz, Sabadu (19/10/2024).
Nia hatutan, iha kee rai kuak hodi hasai Saudoza no subrina nia ruin nee servisu hamutuk ho F-FDTL sira mak sei kee hodi hasai ruin hirak nee, sei ba tau hamutuk iha Saudozu Maucalo nia rezidensia, depois mak haloot iha Metinaru.
Saudoza mate iha loron 7 fulan Maiu tinan 1997, no Saudoza mai husi uma lisan Rai Lisa, Aldeia Wani Uma, Suku Mata Hoi, Postu Administrativu Watulari.
Tuir observasaun STL nian iha semiteriu katak, dader deit familia sira hein ona iha Semiteriu hodi kee sai ruin neebe iha. No antes kee sira mos halo tuir uluk kultura neebe iha.
Akompanha iha kee Saudoza nia ruin nee, familia nomos membru F-FDTL neebe ajuda kee rai kuak.
Familia husi Saudoza Etelvina Fernandes Belo (Bidoli Mau) no nia subrina Domingas Bi Unu Bulere Cartaiano lao misaun servisu ba iha Atauru, ikus mai Roo Mout no sira nain rua mate.
“Iha tinan 1976 bainhira nia partisipa iha luta ida nee liu husi formasaun politika, neebe maun Xanana, Komandante Sabika no Saudozu Lino Lokasa sira nain tolu mak hanorin politika ida nee, laos Saudoza mesak mak partisipa iha formasaun nee, maibe iha joven no feto maluk sira, hodi fahe sira ba iha area zona sira oinsa atu defende nasaun no liberta nasaun,” dehan Domingas Alves da Silva Bilou Mali ba jornalista sira iha Santa Kruz, Sabadu (19/10/2024).
Nia hatete, iha tinan 1976 Saudoza Bidoli Mau asumi kargu Responsável OPMT koloka iha zona Tunil, inklui sira nain lima mak hamutuk, kuandu ikus mai re-instruturasaun zona Tunil fahe fila fali ba zona rua hanesan zona 1975 no 17 de Agosto sira hamutuk, ho Sekretariu Saudozu Zona Joao Menezes no Eis Prezidente Repubika Fransisco Guterres Lu Olo, hamutuk fila fali iha zona 17 Agosto, no Saudoza kontinua sai responsável OPMT.
Nia esplika, bainhira sira tama iha foho matebian, Saudoza kontinua asumi nia kargu ida nee, no baze naksobu sira tama iha gerilha iha 1979 kontinua nafatin nia knaar nee. Depois iha loron 3 Marsu 1981 Saudoza nomea sai ba delegada ba partidu ML FRETILIN, asumi kargu ida nee halao servisu hamutuk ho forsa FALINTIL sira iha gerilha Frente Armada.
Depois iha tinan 1986 hetan nomeasaun foun fali sai Adjunta Politika Militar, kontinua kolokada hamutuk ho forsa sira, no momentu neeba ema kaer Saudozu Komandante Maucalo, Saudoza mos mai ona iha Vila laran, tanba nia oan feto Anina sei mesak la iha apoiu husi familia sira haree sira nia oan, tanba nee Saudoza hatoo nia preokupasaun ba iha Komando, no Komando autoriza atu mai hamutuk ho nia oan nain rua, Anina no Domingas Bihunu Bulere Cartaiano, sira nain tolu rende iha Soibada.
Nia sublina, kuandu rende iha Soibada, laos sira nain tolu mesak mak mai, maibe Bisoi hamutuk ho Komandante Maucore ho Saudozu Mau Mesak sira nain tolu mak lori ba, kalan sira hamutuk dader fahe malu, sira nain tolu fila ba ai laran, no saudoza ho nia oan nain rua ba rende iha Soibada.
Nunee, iha vila laran mos Saudoza kontinua asumi responsabilidade, iha kargu Frente Armada nian neebe asumi, kontinua servisu too nia oan mate.
Momentu neeba Saudoza ho nia oan feto ba iha Atauru, lao iha misaun servisu, hodi kontinua nafatin responsabilidade neebe asumi, momentu neeba ba Atauru atu lori orientasaun ba, maibe roo mout iha tasi laran sira nain rua mate, mate nee laos tanba hahalok inimigu nian, laos por dezastre, maibe roo mout mak sira nain rua mate.
Bilou Mali konta tuir, razaun saida mak desidi sira nian oan Bi Unu mai hamutuk ho Saudoza Bidoli Mau neebe relasaun hanesan inan bin alin, tanba momentu neeba nia kaben mate iha tiru husi inimigu iha operasaun konjunta.
“Nia aman mate tiha, hanesan labarik kiik nia labele hela iha neeba, orientasaun husi Komando haruka mai iha Vila hodi hau inan iha neeba,” dehan Bilou Mali.
Nia hatutan, nia aman mate iha tinan 1986 mate iha operasaun militar, no antes asumi kargu hanesan Komandante rejiaun Nakroma, hetan nomeasaun Kolaborador Xefi Estadu Maior, ao mesmu tempu asumi kargu Primeiru Komandante terseira kompanhia, no nia segundu Komandante mak Brigadeiru Jeneral Maunana.
No ikus mai inimigu tiru mate iha operasaun militar, tanba nee mak desidi nia oan feto Domingas mai iha vila, ikus mai lao hamutuk ho Saudoza Bidoli Mali, no roo mout sira nain rua mate hotu.
(ter)
