DILI, STLTIMORLESTE.com – Tuir informasaun neebe espalha iha media sosiál katak, kareta Funerariu laiha atu tula matebian Januario Marcal, maibe familia mak rejeita kareta Funerariu atu tula matebian, tanba familia matebian hela besik iha Hospital Nasionál Guido Valadares (HNGV).
“Ita nia maluk pasiente nee iis kotu, depois kareta Funerariu mai kedas Mortuariu atu tula matebian Januario Marcal maibe familia mak rejeita, tanba sira hela besik HNGV, sira rasik lori tun mai iha sira nia uma,” hatete Diretor Servisu Apoiu Diagnostiku no Terapeutico, Vidal de Jesus Lopes ba jornalista sira iha nia knaar fatin HNGV, Tersa(15/04/2025).
Nia dehan, laos kareta Funerariu laiha hodi tula matebian Januario Marcal, maibe familia mak rejeita, tanba sira hela besik iha HNGV.
“Iha momentu emosaun hanesan nee ita labele foti desitensia, kareta Funerariu laos la ba, kareta Funerariu ba duni atu tula, maibe familia matebian mak rejeita,” nia deklara.
Iha fatin hanesan, Funsionáriu Iha Sala Mortuariu HNGV neebe lakohi temi naran informa, matebian ho naran Januario Marcal idade 81 neebe mai iha sala Mortuariu HNGV, depois kareta Funerariu la oras too iha Sala Mortuariu maibe familia matebian lakohi kareta Funerariu tula, tanba sira hela besik iha HNGV.
“Mate isin lori mai iha sala Mortuariu la too oras, kareta Funerariu mai atu tula, maibe familia rasik mak rejeita, no sira lori tun ba deit matebian nia rezidensia, tanba sira mós hela besik iha HNGV,” nia afirma.
(jen)
