DILI, STLTIMORLESTE.com – Familia pasiente Jose da Costa Monteiro preokupa ho aimoruk vasina anti raiva (VAR), tanba akontese asu tata ema lori mai Hospital Nasionál Guido Valadares (HNGV) labele salva, tenke lakon vida, tanba aimoruk laiha.
Haktuir Jose da Costa Monteiro ba jornalista STL iha HNGV, Kinta (28/08/2025).
“Ami hatene katak moras-raiva perigozu tebes, tanba nee ita mai HNGV ho esperansa atu hetan prevensaun imediata ba moras raiva liu husi vasina, maibe too iha ospital pesoal saude sira dehan vasina nee laiha ona, ikus rejulta mate,” dehan nia.
Nia tenik, kuandu asu tata komunidade tenke halo prevensaun uluk maka ba moras raiva maka tenke fase ho bee, depois maka vasina ho aimoruk VAR maibe aimoruk iha HNGV la iha ona, atu ba fali neebe, asu neebe tata pasiente nee afeta moras raiva ou lae familia pasiente seidauk hatene.
“Realidade neebe ita hotu akompana iha labarik ida bainhira hetan tata husi asu lori mai ospital dehan ai-moruk laiha, tanba nee ami husu ba governu no Ministeriu Saude hodi haree problema nee ho seriu,” nia esplika.
Iha fatin ketak, Akadémiku Saúde Públika husi Universidade Díli (UNDIL), Filipe Oliveira fiar katak, situasaun ida nee reflete planeamentu no jestaun neebe fraku ba kadeia fornesimentu ba vasina esensiál sira.
Nia deklara, hospitál referal no nasionál sira tenke sai sentru servisu neebe prontu atu atende kazu emerjénsia sira hanesan tata husi animál neebe infeta moras raiva.
“Disponibilidade husi vasina anti-raiva hanesan elementu krusial ida husi sistema resposta saúde públika nian. Nee deit konaba servisu loro-loron nian, maibe konaba prevensaun ba mate. Governu tenke garanti katak, kadeia fornesimentu vasina nian lao ho diak, distribuisaun hanesan ka ekitativu, no laiha stok sira iha instalasaun prinsipál sira hanesan HNGV,” nia informa.
Antes nee mos Diretor Servisu Apoiu Diagnóstiku no Terapeutiku iha HNGV, Vidal de Jesus Lopes rekoñese katak, loos duni agora dadaun ai-moruk vasinasaun ba moras raiva stok limitadu hela, tanba nee mak klinika sira nee la iha hotu.
Jornalista: Jeniche da Costa
Editor: Domingas Gomes
