DILI, STLTIMORLESTE.com – Relasiona ho kazu neebe akontese iha Munisipiu Vikeke neebe viral iha media sosial membru Polísia Nasional Timor Leste (PNTL) nain 4 baku no tebe lesuk sidadaun ho naran Lourenço Gusmão, kazu nee familia vitima la konkorda ho auto defeza husi Komando PNTL Munispiu Vikeke, Superintendente Polisia Antonio Rego mai iha Komandante Jeral (KomJer) PNTL, Komisariu Jeral Polísia Henrique da Costa, nee deklarasaun ba publiku nakonu ho faktus falsu ka hoax.
“Ami husu ba Prezidente Republika, Primeiru Ministru, Parlamentu Nasional husi Komisuan B no Ministeriu Interior atu bolu atensaun ba Komandante Jeral, investiga no prosesu sira neebe ho nasaun defende kriminozu duke defende reputasaun Instituisaun Estadu. Purke auto defeza neebe Komandante Munisipiu Vikeke halo deklarasaun mai iha Komandante Jeral PNTL, Komisariu Jeral Polísia Henrique da Costa neebe liga ba kazu Vikeke nakonu ho deklarasaun falsu, sem faktus no nota momos bosok publiku hodi defende membru kriminozu sira,” hatete Porta Voz Sabino Hornai ba liu husi konferensia impresa, neebe halao iha Jardim 5 de Maio, Díli, Kuarta (12/2/2025).
Nia esplika, deklasaun sira nee hamonu Kredibilidade, Integridade no Reputasaun Instituisaun PNTL agora no iha futuru mai, tanba nee husu ba Instituisaun Judisiáriu, Independente no Orgzanizasaun naun Governamentais sira hotu-hotu hodi ativa akompanha kazu ida nee ate fim hetan jusitisa, tanba nota momos no lo-loos katak, deklarasaun sira neebe fila lia ho faktus falsu hodi vítima sai fali suspeitu no suspeitu sai fali vitima.
“Ami familia vitima la konkorda kona-ba klarifikasaun kronolojia kazu ba publiku husi Komandante Jeral PNTL, Komisariu Jeral Polísia Henrique da Costa hatete katak, vitima nia familia sira husu ona deskulpa ba PNTL Munisipiu Vikeke, nee ami konsidera informasaun nee la loos.
Nia deklara, kondisaun vitima neebe agora daudaun saude ho kondisaun isin komesa tun no grave, tanba kauza husi torturasaun dia 6 Feveiru, tanba nee husu Ministériu Interior, PDHJ, Parlamentu Nasional no Sosiedade Sivil tomak, hodi halo protesaun ba vitima no lori autor nain 4 neebe involve iha kazu ida nee lori too iha Ministeriu Publiku hodi hasoru imputa tuir lei no tuir Prosesu Disiplinar PNTL ba kualker prestasaun.
“Ami familia konsidera autor sira la merese sai kuadrus PNTL neebe diak iha insituisaun,” nia informa.
Aleinde nee mos familia vitima la konkorda no rejeita mos klarifikasaun husi Komandante Jeral PNTL, Komisariu Jeral Polísia Henrique da Costa hatete katak, iha akontesimentu nee vitima lori arma branka hanesan tudik neebe konsidera kontra kodigu penal no Dekretu-Lei Numeru: 5/2017.
“Maibe realidade husi akontesimentu nee ami familia hakarak relata lo-loos katak, vitima la lori arma branka, maibe iha motor kotuk nee mak vitima kesi pasta kiik oan ida neebe iha laran xave no vitima ba neebe deït nia sempre lori, tanba nia ema tekniku tratornista. Ita tenke koalia onestu ba malu no jura ba rai ida nee, tanba rai nee lulik ita sosa ho ruin no raan, tanba nee ita koalia buat neebe loos no labele habosok no inventa,” nia hatutan.
Antes nee Komandante Jerál Polísia Nasionál Timor Leste (PNTL), Komisariu Jerál, Polisia Henrique da Costa hatete, funsionariu ida tenta atu sunu Edifisiu PNTL Munisípiu Vikeke inklui karreta Estadu neebe para iha edifisiu laran, nunee membru polisia kaptura sidadaun nee lori ba Komando Munisipiu Vikeke halo prosesu investigasaun.
“Horiseik akontesimentu ida iha Munisípiu Vikeke maizumenus tuku 1:30, membru PNTL Munisipiu Vikeke deskansa hela maibe ita nia sidadaun ida tama ba iha Komando ho intensaun la diak, atu sunu karreta estadu evidensia neebe para iha Komando inklui atu sunu edifisiu Komandu PNTL Munisípiu Vikeke,” nia deklara.
Komisariu Jerál hatete, aktus neebe sidadaun halo nee konsidera krimi, tanba autor nee kontra prosesu Kodigu penal no mos kontra lei armas branka iha lei 5/2017, tanba uza tudik no gas tenta atu sunu edifisiu PNTL Munisipiu Vikeke inklui karreta Estadu.
“Ita nia sidadaun neebe tama ho evidensia eskeru nomos ho tudik dehan ba membru PNTL Munisipiu Vikeke fatin nee laiha moru diak liu sunu tiha ho nunee membru sira haree atu ba kaer nia, maibe ita nia sidadaun nee konsege halai ho nia motor, entaun ita nia membru sira ho karreta Tranzitu duni tuir iha estrada hafoin halo kapturasaun ho evidensia eskeru ho tudik,” nia informa
Nia dehan, membru PNTL halo kapturasaun no komunika ba Prokurador no Prokurador nia orientasaun ba PNTL halo prosesu ba sidadaun refere.
“Ita nia sidadaun nee mos Funsionariu Publiku ida, tanba nee mak prosesu tomak ita nia parte investigasaun Komando Munisípiu Vikeke lao hela no sei aprezenta ba Ministeriu Publiku (MP), tanba nee mak ami husu ba sidadaun hotu-hotu bainhira iha problema privadu ruma labele hatudu hahalok sira nee ba fasilidade Estadu,” katak nia.
Nia afirma, aktus sira nee konsidera krimi, tanba nia kontra prosesu Kodigu penal nomos nia kontra lei armas branka, iha lei 5/2017 no suspeitu sei iha Komando Munisipiu Vikeke. Nia familia sira mos mai husu deskulpa ba iha Komando Munisípiu Vikeke nomos membru sira dehan ami nia ema nee sala no la merese atu nia halo asaun ida nee, maibe Komando Munisipiu Vikeke dehan nee nia erru, polisia nafatin aprezenta ba Ministeriu Publiku.
(jen)
