DILI, STLTIMORLESTE.com – Konsiente ka inkonsiente, politika governu liu husi Ministeriu Interior hodi fo kuota ba membru Polisia Nasional Timor Leste (PNTL) no Veteranus nia oan iha rekrutamentu ajente PNTL 2025, kontribui ona ba pratika familiarizmu.
Rekrutamentu ajente PNTL nuudar biban ba foin sae sira atu abertamentu preinxe tuir kriteria sira neebe governu defini liu husi prosesu seletivu ida rigor, hodi hili joven sira neebe iha talentu tantu fiziku no mentalmente diak no saudavel, hodi halao knaar polisiamentu nian iha nasaun doben Timor Leste.
Kuota ba membru polisia no veteranu nia oan iha prosesu rekrutamentu ajente PNTL sei kontribui, atu hili joven sira neebe inkapasidade hodi halao servisu polisiamentu nian neebe husi tempu ba tempu nakonu dezafiu oin-oin, instituisaun PNTL presiza joven sira neebe diak iha fizika no mental no iha dedikasaun aas atu servisu ba povu no nasaun.
Tuir Francisco Soares hanesan kandidatu, rekrutamentu PNTL tenke nakloke ba joven hotu, la fihir nia aman polisia ka forsa, ka funsionariu, la fihir nia aman milisia ka veteranu, fihir deit ba nia joven sidadaun Timorense prienxe kriteria sira hotu neebe defini hodi servi povu no nasaun liu husi instituisaun PNTL.
Nia hatete estabelesimentu Instituisaun PNTL tinan 24 liuba mai husi grupu bar-barak, antigu Polisia Indonezia, veteranu, grupu arte marsiais no sira seluk internalmente lori problema neebe seriu ba instituisaun, nunee dezenvolvimentu instituisaun nee ba oin tenke ho nia ema sira neebe hamrik iha lei no ordem, neutru iha servisu polisiamentu nian la sadere ba partidu ka grupu ida.
“Hari Instituisaun PNTL nakonu tiha problema, kor partidu no grupu, agora labele asegura hela nee iha instituisaun PNTL ho kuota ba rekrumentu ba ajente PNTL,” dehan Francisco ba STL iha Kaikoli, Dili.
Entretantu, kandidatu ajente PNTL mai husi munisipiu 13 halo asaun greve iha Ministeriu Interior (MI) nia oin, hodi hatoo sira nia ezijensia relasiona rezultadu teste neebe foin sai ona.
Rezultadu teste neebe fo sai ladun transparante, nunee husu ba Komisaun Rekrutamentu Ajente PNTL nian atu fo sai rezultadu teste kandidatu sira nian abertamente, atu ema hotu bele hare valor neebe kada kandidatu sira hetan iha teste.
Sorin seluk mos hanesan kandidatu, tuir Osvaldo, teste fizika neebe kandidatu sira atravesa iha semana hirak liu ba impresionadu, nakonu tratamentu espesial ba kandidatu balu neebe deskonfia mai husi membru polisia nia oan, veteranu nian oan, no Komisaun Rekrutamentu nia oan, nunee joven sira neebe iha fizika diak laiha oportunidade atu pasa iha teste.
“Rekrutamentu ida mai ho kuota nee, ita nee sorte deit mak liu, tanba membru polisia sira mos hakarak sira nia oan liu, neebe vaga ba ajente PNTL 400 nee barak liu ba polisia nia oan, ita mai atu manan murni hodi sai polisia nee mehi deit,” komenta Osvaldo neebe la pasa iha teste fiziku.
(god)
