DILI, STLTIMORLESTE.com – Maske farda eskola Ministeriu Edukasaun (ME) halo ona lansamentu, maibe husi Eskola Baziku Sentral (EBC – sigla português) Fatumeta hein orientasaun husi Ministeriu liu husi Edukasaun Munisipiu Dili.
Asuntu nee hatoo husi Diretor EBC Fatumeta, Cornelio S. dos Santos ba STL iha nia knaar fatin Fatumeta, Kuarta (08/01/2025).
“Edukasaun fo sai ona, no direita mai ami diretor eskola sira nee, too agora seidauk serteza lo-loos katak, farda nee atu suku husi eskola ou husi ministeriu rasik, ida nee ami seidauk simu informasaun neebe klaru lo-loos kona-ba ida nee,” dehan nia.
Tanba tuir Cornelio, bainhira husi ME tun direita ba eskola sira fo informasaun neebe klaru ba sira, husi eskola mak sukat ou husi ME rasik, tanba nee eskola sei hein informasaun klaru husi ME liu husi Edukasaun Munisipiu Dili ninia.
“Bainhira ME liu husi Edukasaun Munisipiu Dili fo ona orden mai ami prontu halao orden ida nee, tanba ami labele halo rasik farda no labele hakat liu ami nian Edukasaun Munisipiu, bainhira orden seidauk mai, ami nian estudante sira sei uza farda anterior hodi hein informasaun husi ME mai ami eskola sira,” katak nia.
(jac)
