BAUKAU, STLTIMORLESTE.com – Makina fargon neebe iha Diresaun Munisipal Konservatoria Servisu Rejistu Notariadu (DMCSRN – sigla português) Munisipiu Baukau avaria liu ona tinan 2.
Diretora DMCSRN Munisipiu Baukau, Justina das Neves Mendonça relata, atendimentu sertidaun nasimentu iha DMCSRN Munisipiu Baukau hanesan baibain, tanba lao tuir orariu husi Segunda too Kinta, kada semana kontinua atende sidadaun sira, maibe la produs Bilhete Identidade orijinal ba sidadaun sira, mezmu blanku ba Bilhete Identidade sufisiente, tanba makina fargon avaria.
“Ita nia makina avaria tinan 2 liu ba kotuk hadia mos ladiak nafatin, entaun ita tau hela deit bainhira Governu iha ona planu oinsa iha fali ita hein,” hateten Justina ba jornalista STL iha knaar fatin Vila Nova Baukau, Segunda (02/06/2025).
Nia esplika, makina fargon avaria iha parte asesores sira hanesan HDP, laminating ida, neebe tenta halo ona manutensaun, maibe kontinua avaria, tanba nee Governu sei esforsu liu husi preparasaun aprovisionamentu atu atende.
Nia sublina, mezmu makina fargon avaria, maibe servisu atendimentu kontinua lao, tanba sei iha alternativu ajuda sidadaun sira neebe presiza trata Bilhete Identidade.
“Ami nafatin servisu halo atendimentu fornese Bilhete Identidade provizoriu ba maluk sira para bele uza tuir nesesidade neebe iha, maibe sira neebe urujente ba estranjeiru ami fo karta akompanhamentu sira print iha nasional,” Justina akresenta.
Mezmu preokupasaun nunee, maibe durante atendimentu iha DMCSRN Baukau lao diak, tanba fo prioridade ba sidadaun kondisaun moras no defisiensia enkuantu kondisaun normal forma tuir linha.
Aleinde mos DMCSRN Baukau iha politika atende sertidaun nasimentu no Bilhete Identidade ba sidadaun lao labele no kondisaun moras metal iha nivel suku, neebe inisiu tinan nee too ohin loron atende ona sidadaun kondisaun hanesan nain 3.
(tom)
