LAUTEM, STLTIMORLESTE.com – Fasilidade Sekretariu Estadu Formasaun Profisional no Empregu (SEFOPE) iha Munisipiu Lautém sufisiente atu utiliza hodi ajuda komunidade sira.
“Ita nia fasilidade neebe durante nee uza hodi ajuda ba komunidade, liu-liu kandidatura trabalhador sira neebe prepara atu ba servisu iha Australia, nee sufisiente, tanba iha kondisaun balu neebe bele uza hodi apoiu no organiza komunidade sira,” dehan Diretora SEFOPE iha Munisipiu Lautém, Catarina dos Santos ba STL iha Lospalos Vila, Kinta(09/01/2025).
Maibe nia dehan, kondisaun sira nee iha instituisaun publiku no privadu neebe deit sempre hasoru difikuldade oin-oin iha fatin servisu sira, laiha komputador, trasporte no sistema balu neebe bele apoiu administrasaun nian, maibe servisu SEFOPE iha Munisipiu Lautém garante fasilidade sira hodi ajuda no dezenvolve ba nesesidade iha Munisipiu Lautém.
Tanba fasilidade sira neebe difikulta servisu, husi parte SEFOPE iha munisipal sempre halo komunikasaun iha diresaun relevante hodi responde, nunee bele utiliza hodi halo servisu, realidade sistema eletroniku bele uza hodi apoiu ba juventude feto mane sira nia aspirasaun sira atu ba servisu iha rai liur no rai laran.
Iha parte seluk, negosiante iha Lospalos, Afonso da Costa Piedade akresenta, servisu SEFOPE iha nasional too munisipal, durante nee lao ho diak, tanba bele fo servisu ba trabalhador Timoroan sira neebe iha rai liur no rai laran, durante politika ida nee mak hahu halo dezenvolvimentu iha area rural sira.
Husi dezenvolvimentu neebe Governu liu husi SEFOPE halo, rekruta trabalhador Timoroan sira, liu-liu trabalhador husi Munisipiu Lautém oan balu ba servisu iha Australia, Korea-sul, Inglatera no nasaun sira seluk ba buka moris iha ema nia rain, ikus sira fila-fali mai dezenvolve ba nia rain.
Tanba iha tempu uluk nakonu ho baraka, maibe ohin loron nakonu ho uma mutin, signifika politika ida nee susesu atu lori povu no komunidade ba moris sobrevive no adekuadu, nunee apresia tebes ba Governu liu husi SEFOPE nia servisu sira neebe durante nee apoiu masimu ba Timoroan sira nia moris.
Entretantu Veternu Lino da Costa hatete, programa saida deit mak Governu Timor Leste halo tenke mai ho objetivu final, katak lori povu no komunidade ba moris dignu no prosperu, tanba nee saida mak Governu halo ona nee misaun neebe Estadu Timor Leste presiza halo duni ba nia povu rasik.
Luta uluk liberta rai, luta agora liberta ba povu atu lori povu ba moris pas no estabilidade, tanba nee Governu liu husi SEFOPE nia politika halo rekrutamentu ba Timoroan atu ba buka moris iha ema nia rain atu fila-fali hodi hadia no kontribui ba familia no mos ba Estadu Timor Leste.
(EST 1)
