DILI, STLTIMORLESTE.com – Reprezentante Xefe Estadu Maior Jenerál FALINTIL Forsa Defeza Timor Leste (F-FDTL) atuál Komandante Komponente Naval, Komodoro Higino das Neves hatete, iha enseramentu ba Kopa Naval tinan 2025 nee, FC UNBAFU sai vensedor ba Kopa Naval tinan 2025 nian.
“Ba klubu 17 neebe durante hahu jogu ho ksolok, ita ensera ho ksolok, tanba durante ita hahu ita nia Kopa Naval lao diak tebes tuir idak-idak nia tatiku no abilidade neebe hatudu iha kampo, ohin rezultadu klubu rua mak tama final, hau espera katak klubu 2 nee sei hatudu jogu neebe diak,” hatete Komandante Komponente Naval Komodoro Higino das Neves liu husi nia diskurus iha Hera, Segunda (24/02/2025).
Nia tenik, klubu 2 neebe lansa kontra atake malu, hatudu nafatin imi nia disiplina, wainhira iha buat ruma arbitrajen mak iha direitu atu foti desizaun.
“Hau husu ba klubu 2 atu mantein jogu ho disiplina tuir idak-idak nia tatiku neebe iha, husu mos ba adeptus husi klubu 2 atu hatudu imi nia disiplina too jogu nee termina ho ksolok,” nia esplika.
Komodoro Neves mos fo nia dezeju no parabens ba klubu 2 ohin tama final, tanba ho sira nia esforsu hotu mak ohin loron bele hakat too faze ida ikus nian.
Iha fatin hanesan, Prezidente Komisaun Organizadora Kopa Naval Capitaun Tenente, Rosario Alves da Cruz deklara, Ensera Kopa Naval hanesan tradisaun iha Komponente Navak neebe kada tinan ita sempre realiza kopa Naval.
Entretantu Iha Jogu Final ida nee ekipa husi FC UNBAFU hasoru FC AD LAIVAI no Ekipa FC UNBAFU mak sai vensedor hafoin halakon nia adversariu husi klubu FC AD LAIVAI ho skor 3 : 2.
Aleinde nee mos iha Jogu Kopa Naval tinan ida nee hetan suporta mai husi Kompanhia Heineken, Timor Telekom, Karvar Unipesoal.Lda, DCP Australia inklui Dekanu Politeknu UNTL Hera.
(jen)
