DILI, STLTIMORLESTE.com – Tribunal Judisial Primeira Instansia Dili liu husi leitura sentensa, deside aplika pena multa ba arguida ho inisial PdS hanesan feen, tanba baku ka halo agresaun hasoru lezadu ho inisial AES hanesan laen.
Iha desizaun nee, Juiz prosesu Ersilia de Jesus deklara katak, bazeia ba deklarasaun neebe iha, Tribunal fiar katak momentu iha diskusaun tudik iha, maibe arguida la uza tudik atu sona lezadu, no uza save roda tuda ba lezadu.
Tribunal konsidera, faktus provadu mak arguida lori fatuk tuda kona lezadu, no lezadu lori fali mangera metan ida tuda kona arguida nia rentos.
Tribunal esplika, krimi neebe akuza ba arguida, nia kastigu husi loron 30 too iha tinan 3 kadeia, no mos pena multa. Maibe Tribunal haree katak, arguida foin primeira vez mai iha Tribunal, nunee Tribunal deside atu aplika pena multa US$ 45. No Tribunal mos husu arguida atu selu US$ 100 ba lezadu.
Antes nee iha alegasaun Ministeriu Publiku reprezenta husi Prokurador Napolião Soares da Silva, husu Tribunal atu halo alterasaun juridika hodi krime ofensas integridade fizika simples ho forma violensia domestika ba ofensas integridade resiproka.
Enkuantu Defensor Publiku, José Guterre, aseita pedidu Ministeriu Publiku (MP) nian, no husu Tribunal halo akordu ida atu ba futuru arguida labele halo tan hahalok nee ba lezadu.
Tuir akuzasaun Ministeriu Publiku sita katak, iha loron 19 fulan Dezembru tinan 2024, haleu oras tuku 11:00, otl., iha Aldeia Alto Ospital, Dili, arguida PdS foti save roda hodi baku dala ida iha ofendidu nia kabas parte loos, tuir fali arguida foti fatuk ida, hodi tuda kona iha ofendidu nia ain ruin sorin los, tuir fali arguida foti tudik modo nian, iha dapur atu sona ofendidu, mak ofendidu foti mangeira metan hodi tuda kona arguida nia reen-tos mak arguida foin para.
No Konsekuensia direta husi arguida nia hahalok ofendidu hetan moras, bubu no kanek iha kabas parte karuk, ho ain ruin parte karuk.
Hafoin Ofendidu ba halo tratamentu iha Sentru Saude Vera Cruz.
Kauza husi problema nee, tanba wainhira arguida sira rezolve sira nia problema uma laran entre maun alin sira, arguida akuza fali ofendidu mak sai autor ba problema nee nia hun.
Tanba nee MP konstitui arguida PdS, nuudar autor material ho forma konsumadu ba pratika krime ofensa ba integridade fizika simples ho forma violensia domestika 1 (ida), previstu no punidu tuir artigu 145 hosi Kodigu Penal konjuga ho artigu sira 2,3 alinea a) no art. 35º alinea b) hosi Lei Kontra Violensia Domestika n. 07/2010, loron 07 fulan Jullu.
Prosesu nee prezide husi Juiz Singular, Ersilia de Jesus, Ministeriu Publiku reprezenta husi Prokurador, Napoliao da Silva, arguidu hetan asistensia legal husi Defensor Publiku, Jose Guterres.
Jornalista: Terezinha De Deus
Editora: Carme Ximenes
