DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ATMB hanesan laen, tanba komete krime hasoru lezada MT hanesan feen.
Tuir akuzasaun katak, iha loron 29-01-2022, haleu oras tuku 15h OTL, iha lezada nia hela fatin, Aldeia Beduku, Suku Bidau Akadiru-hun, Postu Administrativu Nain Feto, Munisipiu Dili.
Iha tempu neeba arguidu ATMB mak manda mensajen ba lezada nia subrina ida ho naran VdS dehan, “arguidu hakarak tula VdS ba iha Hotel”, mensajen nee lezada mak hetan iha arguidu nia telefone, tanba nee mak lezada ba iha Bidau Lecidere para atu husu tuir ba arguidu.
Wainhira lezada husu tuir, arguidu nega tiha dehan la manda mensajem ba VdS, nunee mosu diskusaun entre lezada ho arguidu, iha diskuti malu nee lezada fo opsaun rua ba arguidu katak “o sai husi uma nee para hau ho labarik sira mak hela iha nee, para kazu nee hau la bele hatete ba VdS, se o la sai, hau sei bolu VdS nia inan para hatete sai, o manda mensajen hanesan nee diak ka lae”.
Ho lezada nia liafuan sira nee, halo arguidu nervozu hodi dehan ba lezada katak “hau sei oho tiha se mak halo problema ba oin”, hafoin hatete tiha hanesan nee arguidu halai kedas ba iha dapur hodi foti tudik ida hodi kaer no hatudu ba lezada no dehan katak “o mangame hau oho tiha o”, depois arguidu kontinua dehan “kuandu koalia hanesan nee arguidu kaer hela tudik iha nia liman, ho ida nee mak lezada nia oan feto ho naran LM mak hadau tiha tudik husi arguidu nia liman hodi ba subar tiha.
Tudik neebe arguidu lori hodi ameasa ba lezada nee nia naruk maizumenus 20 cm, no tudik nee baibain uza para hodi koa modo no rai hela iha dapur mak arguidu halai ba foti hodi ameasa lezada.
Katak antes ida nee data no fulan mak lezada la lembra ona maibe iha tinan 2019, arguidu ATMB mos lori nia liman hodi basa dala ida iha lezada nia hasan halo lezada monu tun tiha ba rai, maibe lezada la halo keixa.
Hafoin akontese tiha kazu nee lezada la konsege halo servisu ho diak, tanba arguidu sempre halo ameasa, insulta liu husi telefone ho lia fuan dehan “o beik hau sei oho tiha o” neebe prejudika lezada nia liberdade movimentu loron-loron no halo lezada sente la seguru.
Ho hahalok sira refere, konstitui arguidu ATMB hanesan autor material ho forma konsumadu ba konkursu real, pratika krime ida (1) arma branka, ameasa no Violensia Domestika ho Forma Ofensa Integridade Fizika Simples.
Hatan ba akuzasaun nee, arguidu deklara ba Tribunal katak, faktus sira neebe mak Ministeriu Publiku akuza ba arguidu nee faktus los hotu kedas.
Lezada mos rekonhese, arguidu halo duni aktu nee, maibe agora sira diak malu ona.
Rona tiha sira, iha alegasaun Ministeriu Publiku husu Tribunal atu aplika pena minimu liu ba arguidu no aplika pena suspensaun ba tinan tolu. Nunee parte Defeza husu Tribunal aplika pena neebe mak justu ba arguidu.
Hafoin rona tiha deklarasaun husi parte hirak nee, Tribunal deside muda ba loron 14 fulan Janeiru tinan 2026, tuku 9 dader, hodi rona desizaun ikus.
Audensia julgamentu nee prezide husi Juiz koletiva, Jumiaty Freitas, José Gonçalves no José Quintão, Ministeriu Publiku reprezenta husi Prokurador Pedro Baptista, no arguidu hetan asistensia legal husi Defensor Publiku Sergio Dias Quintas.
Jornalista: Terezinha De Deus
