DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial SP hanesan laen, neebe komete krimi ameasa hasoru lezada inisial CP hanesan feen.
Iha sala julgamentu laran, Juiz prosesu Arjentino Nunes deklara katak, krimi refere nia natureza semi publiku, lei fo dalan atu dada fila, banhira vitima ka lezada ba iha prosesu hakarak.
Iha tentativa nee, lezada neebe hanesan vitima ba iha prosesu nee hakarak dada fila krimi refere, maibe ho kondisaun katak, arguidu labele halo tan krimi refere iha futuru.
Ho ida nee Juiz konfirma ba iha arguidu neebe hanesan laen, arguidu mos deside katak, arepende tebes ho nia aktu refere no promete sei la halo tan aktu nee iha futuru.
Rona tiha ida nee, Ministeriu Publiku neebe reprezenta husi Prokurador Napoliao da Silva husu Tribunal atu homologa prosesu refere.
Aleinde nee Defeza neebe reprezenta husi Defensor Publiki, Fransisco Soares husu mos Tribunal atu homologa prosesu refere no absolve arguidu husi instansia.
Ikus mai Juiz prosesu deside hodi homologa prosesu refere, absolve arguidu husi instansia.
Juiz mos fo hanoin ba arguidu atu iha futuru labele pratika tan krimi refere.
Tuir kronolojia katak, iha loron no fulan neebe haluha ona maibe iha tinan 2024 iha Komoro, arguidu tenta ameasa lezada, motivu husi problema nee tanba diskute malu kona-ba osan, ho ida nee mak ikus mai arguidu amesa tiha lezada.
Konsekuensia husi arguidu nia hahalok nee, halo lezada sente tauk hodi ikus mai hatoo keixa ba iha Polisia hasoru arguidu..
Tanba nee, Ministeriu Publiku akuza arguidu komete krimi ameasa.
Prosesu nee prezide husi Juiz Arjentino Nunes, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku, Fransisco Soares.
(ter)
