DILI, STLTIMORLESTE.com – Depois de feriadu pasajen no loron boot natal ho tinan foun 2025 nian, estudante sira sente saudades atu tama fali eskola hodi hasoru malu ho sira nia profesores no kolega sira.
Estudante Amelia husi Eskola São Pedro dehan, kleur iha uma saudades fali atu ba eskola. Feriadu kleur halo sira hanesan eskola ona, baruk iha uma. Nee duni hakarak lalais eskola fali para hasoru malu ho profesores no kolega sira hotu, hodi bele simu fali materia eskola nian.
Nia katak, kontenti tebes bá eskola, tanba bele hasoru kolega sira hodi aprende hamutuk siensia neebe fo husi professor sira.
“Hau kontenti los tanba ohin ami hahu fali simu materia eskola nian husi profesor sira. Feriadu kleur iha uma, halo hau baruk no senti kolen fali tanba loron-loron iha uma deit. Kleur iha uma nee halo Hau saudades fali eskola no kolega Sira hotu. Ami tama iha Sabadu nee, mai misa abertura ano letivu eskolar 2026, depois sai misa ami ba haree kedas sala ida-dak nian no hakerek orariu. Neemak ohin ami tama nee eskola los ona,” dehan nia ba STL iha Kampung Baru, Segunda (12/01/2026).
Nia dehan, iha dia 5 nee orentasi bá alin setimu ano sira no remata iha Sesta nee, depois Sabado nee mak misa abertura tinan eskolar 2026 nian.
Nia hatutan, tama fali eskola nee senti kontenti los, tanba durante feriadu naruk nee saudades los eskola, saudades kolega no profesor sira.
Nunee mos Estudante Armindo da Costa husi Eskola Amigos de Jesus hatete, kleur iha uma halo sira haluha hotu materia, neebe kuandu tama fali eskola hanesan nee sira kontenti tebes.
“Kleur iha uma nee halo ita baruk no haluha hotu siensia sira, tanba halimar mak barak liu. Iha uma nee hanoin deit mak han no toba halimar hotu tama fali uma ona. Neebe halo ami baruk los, kuandu eskola fali nee halo ita sibuk hela deit,” tenik nia.
Nia afirma, agora dadaun nia pasa bansetimu ano husi eskola Amigos no kontinua nafatin iha refere. Sira estudante setimu ano nee tama eskola hahu kedas iha dia 5 nee hodi tuir orentasi.
Entertantu Akin Gomes, Estudante husi eskola EBF 12 de Outobru hatete, saudades los ho nia kolega sira eskola sira. Durante feriadu iha Uma la hasoru kolega sira, maibe tama fali eskola nee sira hasoru hodi hakilar malu, hakuak malu ho fo kontenti bá malu.
“Hau kontenti los tama fali eskola, hasoru hau nia kolega no profesor sira. Kleur iha uma nee, halo Ita saudades hakarak simu fali materia sira husi profesor,” dehan nia.
Akin hatete, eskola tama iha dia 5 nee maibe seidauk eskola los, tanba Profesor sira sei prepara taka estudante sira nia naran iha sala ida-idak nian. Neebe Segunda nee mak foin eskola los no tama aula simu materia husi profesor sira.
(dom)
