DILI, STLTIMORLESTE.com – Prezidente Parlamentu Nasional (PPN), Maria Fernanda Lay hateten, tenke ka presiza sosa kareta foun ba deputadu sira hodi halo fiskalizasaun, tanba kareta neebe durante nee deputadu sira uza maioria aat hotu no kustu manutensaun kareta karun.
Nia dehan, prosesu sosa kareta ba deputadu sira nee Sekretariu Jeral Parlamentu Nasional mak presiza koalia, tanba ninia prosesu nee iha Komisaun Nasional Aprovizionamentu laos iha Parlamentu Nasional.
Tanba Parlamentu Nasional presiza sosa kareta foun ba deputadu sira iha Parlamentu Nasional hodi halao servisu, liu-liu halao fiskalizasaun ba programa governu nia neebe implementa iha teritoriu laran.
“Kareta sira deputadu uza nee aat hotu ona, hau mak hatene aat ka lae, tanba nee Konselhu Administrasaun aprova iha tinan kotuk 2024 hodi hola kareta iha tinan 2025 nee. Tenke troka duni, tanba se lae gasta nee boot tebes-tebes,” hatete PPN ba jornalista sira, iha Parlamentu Nasional, Tersa (26/08/2025).
Prezidente Parlamentu Nasional nee hatutan, laos Parlamentu Nasional deit mak sosa kareta, sosiedade sivil sira tenke kontrola instituisoens hotu-hotu neebe hola kareta no uza la tuir dalan.
(alb)
