BAUKAU, STLTIMORLESTE.com – Bispu Dioseze Baukau, Dom Leandro Maria Alves dehan, Festa Natal nuudar Festa Familia nian, tanba nee husu perdua malu hodi selebra Festa nee nakonu ho domin.
Dom Leandro Maria Alves esplika, loron 24 Dezembru mak loron neebe Nain Jesus Kristu mai moris iha mundu, hodi hatudu Maromak nia domin ba ema hotu atu fiar ba Nai Maromak.
“Husu ba sarani sira atu prepara aan ho diak, hodi selebra Nain Jesus Kristu nia moris nee sai hanesan ita nia Festa, loke ita nia fuan ba Nai Maromak atu grasa neebe ita hetan hasulin too iha ita nia vida loron-loron nian iha ita nia komunidade,” hateten Dom Leandro iha Vila Antiga, Tersa (24/12/2024).
Bispu Diozese Baukau nee sublina, prezensa Nain Jesus Kristu iha mundu fo hanoin ba ema hotu atu sai domin nain no perdua malu hodi harii sosiedade ida neebe harmonia.
Dom Leandro konsidera, festa Natal nuudar festa Familia nian atu selebra, tanba sarani sira hahu prepara aan, balun neebe halao servisu dook husi familia oras nee idak-idak halo nia viajen fila ba knua atu selebra festa Natal.
“Ita dehan Natal nee familia nian, ita neebe hamutuk iha familia ida sai familia Maromak nian, nee duni hanesan familia Maromak nian buka atu hadomi malu, perdua malu no buka respeita malu,” nia tenik.
Dom Leandro husu sarani sira atu nafatin valoriza malu, fo valor boot ba hahalok hadomi malu, perdua malu no respeita malu, hodi banati tuir Kosok Oan nia prezesa iha mundu ho hamnasa.
Tanba liu husi kultura hamnasa ba ema hotu mak hanesan kultura ida neebe hanesan Nai Maromak liu husi Kosok Oan Jesus Kristu nia hamnasa ba ema hotu hodi dada ema hotu atu besik liu tan ba iha Nai Maromak.
(EST 2)
