BAUKAU, STLTIMORLESTE.com – Situasaun durante selebrasaun festa natal no husik tinan tuan simu tinan foun iha Munisipiu Baukau lao kontroladu.
Informasaun nee hatoo husi Komandante Komando Polisia Munisipiu Baukau, Superintendente Xefe Polisia Antonio Maria de Sa ba jornalista sira iha Vila Nova, Segunda (06/01/2025).
“Hanesan ita hotu akompanha, situasaun durante periodu natal no simu tinan foun enjeral lao kontroladu, laos hahu deit loron natal iha dia 24 kalan, mais hahu kedas husi loron finadu nomos eventu boot sira mai ultimu hora tinan tuan no tinan foun,” nia dehan.
Komandante nee sublina, situasaun jeral iha Munisipiu Baukau lao kontroladu hahu kedas husi selebra loron finadu nomos loron nasional sira hanesan selebra loron 12 Novembru, 28 Novembru, inklui 7 Dezembru too selebra festa natal no husik tinan tuan.
Nia katak, aleinde selebrasaun loron hirak nee, inklui mos prosesu muda negosiante sira husi merkadu tuan Vila Nova, beskem no Vila Antiga ba merkadu foun Tuanau, entidades hotu liu-liu negosiante sira koopera, tanba liu husi kontribui hotu kria pas no estabilidade mak bele kria benefisiariu ba prosesu dezenvolvimentu.
Komandante Munisipiu nee konsidera, durante eventu sira lori situasaun hakmatek hodi selebra no taka loron ikus tinan tuan 2024 nian, tanba entidades sira, liu-liu joven iha ona konsiensia maturidade ba kontribui dezenvolvimentu liu husi kria pas no hakmatek.
Komandante nee rekonhese, mezmu durante selebrasaun festa husik tinan tuan no simu tinan foun, maioria komunidade liu-liu joven sira harame sidade Baukau liu husi Gas motor no tiru fugetis, maibe la hamosu insidente balun, tantu kiik no boot, tanba nee aktus selebra husik tinan foun hodi simu tinan tuan ho kontente.
Husi selebrasaun eventu sira neebe konsege ho situasaun lao kontroladu, kontinua husu joven sira nafatin kria pas no estabilidade iha Baukau, nunee bele foku ba dezenvolvimentu ho diak.
Entretantu durante selebrasaun husi loron finadu too selebra festa natal no simu tinan foun patrolhu masimu husi parte seguransa sira neebe kompostu husi F-FDTL, Polisia Militar, Polisia Nasional Timor Leste no BOP destakadu rejiaun Leste iha Munisipiu Baukau.
(EST 2)
