DILI, STLTIMORLESTE.com – Ohin Igreja Katolika selebra festa Solenidade Epifania do Senhor ka Festa Natal ba Nasaun hotu, hodi komemora ema liurai matenek no haraik aan neebe mai husi Lorosae atu adora no tuku tur hanai Nai Jesus Kristu.
Lia hirak nee hatoo husi Padre Richardo Pasang, SVD ba STL liu husi nia reflesaun Diaria, Domingu (05/01/2025).
Nia dehan, ohin Festa Solenidade Epifania do Senhor Is 60 : 1 – 6 Ef. 3 : 2 – 3, 5 – 6 Mat. 2 : 1 – 12.
“Loron ida ohin, ita hotu selebra Solenidade Epifania do Senhor ou Festa Natal ba Nasaun hotu hodi komemora ema liurai matenek no haraik aan neebe mai husi Lorosae atu adora no tuku tur hanai Nai Jesus Kristu, Gaspar, Baltazar no Melkior. Sira nain tolu husik sira rai lao ba Belem hamutuk ho fitun nabilan atu tuku tur hanai Kosok Oan nee. Fitun naroman sai ‘kompas’ hodi hatudu dalan iha sira nia peregrinasaun. Liurai matenek, no haraik aan halao peregrinasaun nakonu ho ksolok, nakonu ho esperansa hodi hasoru Jesus Kristu Kosok Oan iha Belem. Peregrinasaun liurai nain tolu nee fo hanoin sarani katolica nasaun sira hotu iha mundu, relasaun ho Tinan Yubilee 2025 nuudar tinan ‘Peregrinasaun da Esperansa’ sarani sira atu hetan perdaun, grasa husi Nai nia misercordia,” dehan Pe. Richardo.
Profeta Isaias hatoo ona antes katak nasaun sira hotu sei lao ba naroman no liurai mundu nian sei lao ba ‘Luce’ neebe mosu iha Belem. Profeta Isaia iha Primeira Leitura hateten Jerusalem hamriik, nabilan ba O nia Maromak too ona mai. Nai nia naran boot mak harii ba o fohon, wainhira kalan taka rai-klaran, wainhira nakukun falun ema sira, maibe husi o leten; Nai mosu mai. Nia naran boot mahan o fohon. Ema sira tuir o nia nabilan, liurai sira sei hakat ba o nia rai-hun mutin.
Profeta Izaias nia haklaken hodi hatudu katak akotesimento Nai Jesus Kristo nia presensa, moris iha mundu nee atu salva ema hotu husi nasaun sira hotu. Tan nee, tinan Yubilee 2025 ho lema ‘Peregrinasaun da Esperansa’ husi sarani katolica husi nasaun sira hotu atu hola parte iha orasaun no peregrinasuan atu hetan grasa no perdaun husi Maromak.
“Peregrinasaun liurai matenek nain tolu ba Belem, hanorin mos mai ita katak wainhira ita ita hotu hola parte iha peregrinasaun nee, ita sai heransa no membru husi Jesus kristo nia isin ida deit. Saun Paulo iha Segunda leitura hateten, Hodi Espiritu Santu, ba Nia Apostolu santo no ba Nia Profeta sira Ema gentio simu mos liman rohan, hanesan judeus. Gentio no judeu halo ema isin ida deit, sira hamutuk, simu hanesan, lia Maromak hakotu, hodi Kristo Jesus, husi Evangelho. Jesus Kristo nia presensa iha mundu, halibur ema hotu atu harii Kreda ida deit, santa, Katolika, Apostolika,” dehan Padre Richardo.
Padre nee hatutan, wainhira liurai matenek haraik aan nain tulu hasoru Kosok Oan, sira kontente tebes. Ho haraik-an, sira hatudu sira nia fuan solider ou ‘fuan compartilhado’ (hati yang berbagi) hamutuk ho Jesus Kristu. Liurai matenek primeiru oferese osan mean tanba nia hare Jesus Kristu nuudar Liurai Boot. Liurai matenek Segundu oferese ai-wen morin tanba hare Jesus nuudar Nailuluk Boot. Liurai matenek terseiru oferese mina morin tanba haree Jesus sei mate atu salva ema hotu husi salan.
“Liurai nain tolu hatudu no hanorin mai ita espiritu atu fahe ’espiritu kompartilhadu no hatudu sira nia laran empatia ba Kosok Oan. Sira halo ho alegria, la ho murmura. Sira nia prinsipiu mak ami mai atu tuku-tur ba Nai. Peregrinasaun iha tinan Yubilee 2025 husu mos atu sarani Katolika hatudu espiritu atu fahe ‘espiritu compartilhado ba ema sira neebe presiza ita nia tulun,” katak Padre nee.
Bibi Atan Kreda Katolika nee haktuir tan katak, husi peregrinasuan liurai nain tolu ema apriende valores moris kristaun neebe sei implementa iha moris nuudar peregrinu da esperansa. Sira hanorin hodi haree Jesus nuudar Naroman nabilan ho kbiit bele dada ema hotu mai tuku tur hanai Maromak.
“Jesus dehan Ema hotu neebe Aman entrega mai Hau, Hau sei la soe Hahu husi Moris, durante halao misaun no Jesus nia mate, sempre interesante ema sempre hateke ba Nia. Jesus mak Alva-Omega, hori uluk-hori wain no ba nafatin Perguntas ba Ita sarani sira hotu Apakah Jesus Kristu sei interesante ba ita atu ita lao ba hasoru Nia hodi tuku tur hanai Nia? Ho selebrasaun Epifania loron ohin mai ita hotu sai naroman atu leno ita nia an rasik, no leno ema seluk hodi oferese, hatene fahe, solider nuudar peregrinu da esperansa ba ema seluk. Amin,” dehan Bibi Atan Kreda Katolika nee.
(eme)
