DILI, STLTIMORLESTE.com – Prezidente Komisaun Festival Agroekologia, Herminia de Jesus pinto hateten, eventu agroekologia hanesan espasu ida hodi kria dialogu entre produtor no sosa nain sira.
Lia hirak nee hatoo husi Prezidente Komisaun Festival Agroekologia, Herminia de Jesus Pinto liu husi nia diskursu iha Farol, Díli, Kinta (21/11/2025).
Nia dehan, Agroekologia promove Biodiversidade iha produsaun ai-haan nian, tanba nee mak agroekologia reziliente tebe-tebes iha mudansa klimatika.
Nia akresenta, dezafius neebe toos nain sira hasoru mak produtu agrikola, tanba sira seidauk asesu diak iha merkadu.
“Daudaun nee agroekologia sei iha nivel produsaun, ita foin mak hakat neineik ba iha merkadu nian, dezafius neebe toos nain sira hasoru mak produtu agrikola sira seidauk asesu diak iha merkadu ho difikuldade oin-oin, ho depedensia neebe mak boot tebes iha intermediariu sira.
Mezmu nunee, bainhira mediariu sira ba too iha toos nain sira ninia fatin ho presu neebe mak ita konsidera kiik liu no meia justu ba toos nain sira neebe mak tau esforsu boot tebes-tebes ba iha ai-haan nian.
Nia dehan, festival agroekologia ida nee toos nain sira hamutuk 20 mak konsege partisipa iha festival ida nee.
“Eventu ida nee ita konsege mobiliza toos nain sira, no grupu toos nain sira hamutuk 20 ital mak mai partisipa, munisipiu sira hotu partisipa, maibe munisipiu rua hanesan Ainaro ho Lautem mak la partisipa iha festival ida nee,” tenik nia.
Ho nunee mak TAPSA hamutuk ho parseiru sira hanesan Mata Dalan Institute (MDI), PERMATIlL, Kadalak Sulimutuk Institute (KSI) ho HAK realiza eventu Festival Agroekologia nee ida nee.
Jornalista: EST 1
Editor: Xisto Mendonça
