DILI, STLTIMORLESTE.com – Oras nee daudaun feto barak mak kontribui ona ba dezenvolvimentu nasional, liu husi sira nia partisipasaun sira iha area neebe haknaar aan ba.
Kestaun nee hatoo husi Feto Potensial Maria Amaral ba STL, iha nia knaar fatin, Kaikoli, Dili, Segunda (04/11/2024).
Nia hatete, oras nee daudaun feto barak mak hola parte ona iha dezenvolvimentu nasional no feto mos assumi ona kargu neebe importante.
“Maski sei minus kompara ho mane, maibe realidade hatudu katak feto barak mak hola parte ona iha area sira neebe mak importante nee, hanesan balun assumi nuudar Ministra, balu iha Diretora, balu fali mos assumi iha Xefia iha fatin seluk, ida nee hatudu katak feto mos konribui ona ba dezenvolvimentu nasional,” katak nia.
Nia hatete, maski iha servisu fatin mane sei barak liu feto, maibe iha parte balu mos feto mak lidera ou Xefia ba fatin neebe mane haknaar aan ba.
“Importante mak feto ho mane nafatin hamutuk hodi bele kontribui lori dezenvolvimentu ba oin, tanba ita harii nasaun liu husi luta feto hatudu ona sira nia kontribuisaun no agora ukun aan mos feto inklina aan ona, husu nafatin hamutuk hodi lori rai nee ba oin,” katak nia.
Nunee mos Eis Prezidente Rede Feto, Judite Dias Ximenes enkoraza nafatin feto hotu neebe mak seidauk hetan oportunidade kontinua kapasita aan nafatin.
“Sira neebe mak seidauk hetan oportunidade labele lakon esperansa maibe kontinua kapasita aan liu husi tuir formasaun sira, nunee hariku aan ho esperiensia no matenek nunee bainhira hetan oportunidade bele inklina aan deit,” katak nia.
(eme)
