DILI, STLTIMORLESTE.com – Feto presiza kapasita aan nunee bele sai lider ka movimentu sosial politika, tanba lei rasik garantia feto nia direitu.
Kestaun nee hatoo husi Feto Potensial, Merlinda Soares Pinto de Aquino ba STL, iha nia knar fatin Plaza, Segunda (29/09/2025) hatete, feto Timor-Leste tempu difisial sira hatudu ona sira nia kapasidade maski iha tempu neeba seidauk iha lei neebe garante sira nia direitu, maibe sira hatudu sira nia brani tebes hamutuk ho mane hodi lori rai nee ba hetan ukun rasin aan, ohin loron Timor Leste uku naan feto lubuk hatudu ona kapasidade kaer kargu sira neebe importante hanesan Prezidente Parlamentu, Ministra, no seluk tan, tanba nee nafatin enkoraja atu feto neebe seidauk hetan oportunidade keta lakon esperansa maibe kontinua aprende hodi sai lidee movimentu sosial politiko sira.
“Feto sira hatudu brani hodi inklina aan partisipa Feto iha Lideransa katak, Feto sira neebe sai lider iha movimentu sosial no politik,” dehan Feto Potensial nee.
Nia hatutan, konsistensia katak feto sira iha tempu neebe susar maibe sira nafatin fo kontribuisaun ba dezenvolvimentu rezilensia katak feto sira la senti kolen, maski infrenta dezafiu barak husi feto nia kontribuisaun sira nee husik hela valor ba foinsae sira hodi lao tuir hodi partisipa iha konstrusaun estadu.
“Esperensia neebe husik hela mai ita mak hanesan, Valor solidaridade katak feto sira aprende atu servisu hamutuk hodi apoiu malu.Importansia Edukasaun katak Edukasaun papel ida hodi bele kontinua luta ba mudansa ba dezenvolvimentu ba povo no nasaun,” dehan nia.
Nia hatutan, hakrak halo mudansa tenke hetan inspirasuan husi istoria feto maluk sira neebe husik hela mai ita hodi kontribui ba dezenvolvimentu nasaun. Labele tauk tenke brani hodi fo idea kritiku neebe konstrutivo hodi halo mudansa ba dezenvolvimentu nasional liuhusi partisipasuan ba Feto iha area oin-oin.
Nunee mos Feto Potensial, Maria Amaral hatutan, sira mos nafatin fahe formasaun ba feto sira oinsa feto sir abele sai lideransa no foti desizaun sira.
“Lei garante hela feto nia direitu maibe sei iha bareira oin oin nebee mak Feto sira hasoru, maibe ho bareira sira neebe iha lataka dalan ba feto, bainhira feto iha duni vontade atu kompete, tanba nee nafatin prepara aan sai feto neebe sorte hodi assume kargu importante sira, feto bele sai lider ou saida deit,” katak nia.
Nia sublina, ohin loron iha nivel aas liu liu Prezidente Republika no Primeiru Ministru mak feto seidauk assume, maibe Prezidente Parlamentu feto lidera ona,m no iha Minnistra no Visi Primeiru Ministru feto assume ona kargu ida nee sai ona lisaun ida katak, foti desizaun ka saida deit feto mos bele.
Aleinde nee Diretora Interina Fundasaun Caucus Feto ba Politika, Julieta Fereira da silva husu feto sira, atu kompete aan iha atividade saida deit.
“Ami nia mensajen ba feto maluk sira katak liu liu sira iha partidu politiku atu kompete iha eleisaun liu liu iha eleisaun lokal neebe mai no dezetralizasaun poder lokal nian, ami husu para feto sira atu asesu ba imformasaun hotu hotu, atu bele hatene saida mak bele dezentralizasaun nomos poder lokal hodi hodi kompete iha neeba,” dehan nia.
Diretora Interina nee dehan, feto nafatin kapasita aan iha partidu politiku, nunee bele assume kargu ruma nunee bele foti desizaun.
Jornalista: Emerenciana Pinto
Editora: Carme Ximenes
