DILI, STLTIMORLESTE.com – Feto hatudu nia kapasidade no barani hahu iha tempu neebe mak difisil liu husi luta ba ukun rasik aan, agora foinsae feto sira nafatin esforsu aan hodi partisipa iha prosesu dezenvolvimentu nasional.
Lia hirak nee hatoo husi Feto Potensial, Merlinda Soares Pinto De Aquino ba jornalista STL iha nia knaar fatin Timor Plaza, Segunda (14/07/2025).
Nia hatete, haree husi istoria neebe iha hatudu katak luta ba ukun rasik aan nee laos mane deit maibe feto mos inklina aan, maske iha tempu neebe mak difisil sira hatudu ona sira nia barani, tanba nee ohin loron rai hetan ona indepedensia no Governu ou Estadu mos fo garantia ba feto atu partisipa iha atividade hotu, tanba nee feto sira nafatin esforsu aan hodi partisipa masimu iha prosesu dezenvolvimentu nasional.
Nia hatete, tempu luta feto sira hatudu barani hodi inklina aan partisipa, Feto iha lideransa katak Feto sira neebe sai lider iha movimentu sosial no politika.
“Konsistensia katak Feto sira iha tempu neebe susar maibe sira nafatin fo kontribuisaun ba dezenvolvimentu rezilennsia, katak Feto sira la senti kolen, maske enfrenta dezafiu barak,” katak nia.
Feto nia kontribuisaun sira nee husik hela valor ba foinsae sira hodi lao tuir hodi partisipa iha konstrusaun estadu,” katak nia.
Feto Potensial nee haktuir tan katak, husi luta inan feton sira nia fo motivasaun ba feto foinsae sira hodi hakat tuir sira nia ain fatin, no sira nia esperiensia luta sai valor boot solidariedade, no fo korajen ba feto agora oinsa bele suporta malu servisu hamutuk hodi apoiu malu.
Nia mos fo korajen ba feto sira labele tauk hodi luta ba oin, haree ba istoria inan feto sira nia sai inspirasaun nunee tenke barani hodi hakat ba oin.
Iha biban nee nia mos husu feto sira atu ativu iha prosesu dezenvolvimentu nasional, presiza kapasita aan liu husi formasaun oin-oin, nunee bele hasae kapasidade no skil nunee bainhira hetan oportunidade laos ba aprende maibe ba atu servisu.
Merlinda dehan, ida neebe mak hetan ona oportunidade kontinua avansa ba oin no ida neebe seidauk hetan oportunidade labele lakon esperansa, maibe koko kapasita aan nafatin hodi hein oportunidade neebe sei mai, importante mak prepara aan ho kapasidade no prontu iha kualker tempu bainhira hetan oportunidade.
Nunee mos Diretora Interina Fundasaun Caucus Feto ba Politika, Julieta Fereira da Silva husu feto hotu neebe mak partisipa iha vida politiko atu kompete aan iha eleisaun lokal neebe sei mai.
“Ami nia mensajen ba feto maluk sira, liu-liu sira neebe iha partidu politiku atu kompete iha eleisaun liu-liu iha eleisaun lokal neebe mai no desentralizasaun poder lokal nia, ami husu para feto sira atu asesu ba informasaun hotu-hotu atu bele hatene saida mak bele desentralizasaun nomos poder lokal hodi kompete iha neeba,” dehan Diretora Interina Fundasaun Caucus.
Diretora Interina dehan, feto nafatin kapasita aan iha partidu politiku nunee bele asumi kargu ruma hodi bele foti desizaun.
(eme)
