DILI, STLTIMORLESTE.com – Feto mos iha direitu atu sai nain ba rai ou eransa neebe beiala sira husik hela, tanba nee feto ruma diskrimina iha familia iha direitu atu bele rekere.
Lia hirak nee hatoo husi Sekretariu Estadu ba Igualdade (SEI), Elvina Sousa ba jornalista sira bainhira remata partisipa enkontru Rede Referal da tolu iha Salaun Maria Goreti, Kaikoli, Sesta nee (18/10/2024).
Nia hatete, oras nee daudaun lei garante ona feto nia direitu ba rai, tanba nee husu karik mosu diskriminasaun ruma bele hatoo keixa.
“Lei provizaun legal no lei sira fo dalan ba feto atu sai nain ba rai, maibe kulturalmente la fo dalan sei nafatim diskrimina feto atu labele sai nain ba rai, ida nee fila fali ba feto maluk sira, katak se iha ona lei neebe koalia ita feto iha direitu ba rai o sai nain ba rai ou bele hetan eransa liu-liu ba rai, uma no sasan sira nee ita tenke rekere ita nia direitu,” katak SEI.
Iha biban nee, Elvina mos enkoraja feto maluk iha Timor laran tomak katak, oras nee daudaun iha ona lei neebe mak garante feto mos iha direitu sai nain ba rai ka eransa neebe iha, tanba nee husu atu rekere mos direitu bainhira mosu diskrimisaun iha familia.
“Hau enkoraja feto maluk sira hotu neebe mak sai vitima liu-liu iha familia laran rasik neebe mak diskrimina sira atu labele sai nain ba rai, pur ezemplu inan aman tuur hamutuk desidi atu fahe rai maibe la involve feto sira, no inan aman mos dala barak la fo sai ba oan feto sira, hau hanoin kontra lei, lei iha ona feto sira barani hamriik hodi bele rekere sira nia direitu sai nain ba rai, tanba oan feto ka mane sira hotu direitu no obrigasaun neebe mak hanesan nomos direitu hanesan iha lei nia oin,” katak nia.
Nia afirma, luta esensial husi SEI nia mak ema hotu-hotu iha direitu no obrigasaun hanesan iha lei nia oin, nomos hotu-hotu iha direitu neebe mak hanesan.
Nunee mos Tuir Eis Prezidente Rede Feto, Judite Dias Ximenes katak, oras nee daudaun husi parte governu no organizasaun feto luta makaas ba direitu feto atu partisipa iha eventu hotu no direitu mos atu bele hetan rai.
“Lei garante ona katak oan feto no mane iha direitu neebe mak hanesan, no lei mos garante katak feto ho mane iha direitu atu hetan eransa neebe inan aman ka avo vizavo sira husik hela, no feto mos iha direitu sai nain ba rai,” katak nia.
Nia mos enkoraja feto maluk sira karik sai vitima iha familia liga ho fahe riku soin ka hetan diskriminsaun ruma iha familia bele rekere tuir dalan legal nia.
(eme)
