DILI, STLTIMORLESTE.com – Ministeriu Publiku (MP) iha alegasaun ba krime Maus Tratus husu Tribunal atu kondena pena suspensaun ba arguidu inisial AJ, neebe komete krime ka tuku nia feen boot (Lezada) inisial EA too matan metan, tanba nia (arguidu AJ) hakarak kaben fali ho feto kiik.
Iha alegasaun Prokurador Nelson Magno deklara, arguidu konfensa imparsial ba faktus, loos duni arguidu halo agresaun hosoru lezada no arguidu mos tuir duni feto kiik, tanba nee husu ba Tribunal atu aplika pena prizaun tinan rua suspende ba tinan rua.
Enkuantu parte Defeza husu ba Tribunal atu aplika pena multa ba arguidu.
Rona tiha alegasaun, Tribunal adia ba loron seluk hodi tama ba iha desizaun.
Tuir akuzasaun katak, arguidu AJ ho lezada EA hela no moris hamutuk iha uma ida nuudar fen ho laen desde tinan 2012.
Durante forma sira nia uma kain, lezada ho arguidu kous oan tolu, feto ida ho mane rua, ekonomikamente la dependensia ba arguidu tanba arguidu hola ona feto kiik.
Iha loron 14 fulan Outubru tinan 2024, oras tuku 10:00 otl, arguidu halo agresaun fizika hasoru lezada, iha sira nia uma lokaliza iha area Tasi Tolu, Dili.
Motivu husi mosu problema, lezada rona arguidu hakarak hola fali feto kiik, tanba nee mak lezada mos koalia ba arguidu katak, ”O ba ona hola feto kiik, o nunka responsabiliza ba labarik nain tolu ho hau, husi lia fuan nee mak halo arguidu nervozu hodi halo kedas agresaun fizika hasoru lezada,” hatete akuzasaun nee.
Momentu nee, arguidu hodi ain tebe dala ida ho makas kona iha lezada nia kidan halo lezada monu ho pozisaun toba takrabat ba iha rai, wainhira lezada hader no hamrik husi rai, arguidu kontinua hodi liman tuku tan dala rua ba lezada nia rentos ho matan fukun parte loos hodi rezulta bubu no metan, arguidu sei kontinua tuku tan dala ida ba lezada nia kelen parte karuk hodi rezulta moras tanba bubu no metan no ikus mai arguidu foti tudik ida hodi tuda lezada, maibe tudik refere la kona lezada, hafoin lezada halai sai husi uma ba halo kedas keixa iha Polisia Eskuadra Komoro.
Konsekuensia husi agresaun arguidu nian, lezada sente moras, bubu ho metan iha nia rentos, matan fukun parte loos ho kelen karuk durante semana ida resin mak foin rekopera.
Iha tinan 2021, 2022, 2023, arguidu sempre halo agresaun fizika hasoru lezada, maibe lezada nunka ba halo keixa.
Arguidu halo ho forma livre, ho depropozitu halo agresaun fizika hasoru lezada, nuudar arguidu nia kaben, katak agresaun mak arguidu halo hasoru lezada, konsidera hanesan meiu ida hodi halo moras ba lezada nia isin, tuir buat neebe mak hakerek ona iha leten.
Hahalok arguidu nian ho konxiensia rasik no hatene katak, hahalok nee lei bandu, maibe arguidu halo nafatin.
Ho hahalok sira nee, konsidera arguidu AJ, hanesan autor material ho forma konsumadu. Pratika Krime Violensia Domestika, tuir artigu 3, 35 husi Lei n. 7/2010, ho forma Maus Tratus ba Konjuje, tuir artigu 154 husi Kodigu Penal.
Audensia julgamentu nee, prezide husi Juiz koletivu, Ivan Suritai, Zulmira Auxiladora, Argentinho Nunes Ministeriu Publiku reprezenta husi Prokurador, Nelson Magno, arguidu hetan asistensia legal husi Defensor Publiku Estajiariu nain ida.
Jornalista: Terezinha De Deus
Editora: Carme Ximenes
