DILI, STLTIMORLESTE.com – Feto labele minimiza aan, maibe tenke kapasita aan ho kapasidade neebe iha hodi bele kompete iha area hotu.
Feto Potensial Maria Amaral ba jornalista STL via telefone, Tersa nee (26/08/2025) hatete, feto nia involvimentu iha dezenvolvimentu nasional nee importante tebes, tanba nee labele minimiza aan katak, labele fo oportunidade ba mane mesak.
“Labele dehan tanba hau feto ou tanba hau seidauk bele, maibe nuudar feto labele minimiza aan rasik, tenke kapasita aan liu husi formasaun oin oin hodi hasae kapasidade no skil, nunee bainhira hetan oportunidade ruma feto prontu ba lidera no partisipa iha kualker atividade,” katak nia.
Nia hatete, lei garante ona katak feto ho mane iha direitu no obrigasaun neebe hanesan, tanba nee papel feto mos importante iha prosesu dezenvolvimentu nasional, nomos iha atividade saida deit.
Nunee mos Prezidente Ezekutivu Rede Feto, Zelia Fernandes hatete, feto nia luta sei hasoru dezafiu oin oin, maibe husi bareira sira nee lataka dalan feto nafatin buka esforsu aan hodi kompete.
“Ita sei hasoru dezafiu barak tebes mesmu tinan 25 restaurasaun independensia ita kontinua hatudu, liu-liu feto maluk sira kontinua hatudu kapasidade, hatudu didikasaun hodi kontribui ba ita nia rai, liu liu prense ba ukun aan,” katak nia.
Nia dehan, feto luta nain sira hatudu ona sira nia kapasidade kontribui ba prosesu libertasaun nasional, entau ejize mos jerasaun foun atu kontinua kontribui liu husi aspektu hotu.
(eme)
