DILI, STLTIMORLESTE.com – Atu dezenvolve nasaun nee ba oin laos mane deit, maibe konta ho feto nia prezensa, tanba sira mos luta ba rai ida nee hetan ukun rasik aan.
Feto Potensial, Martinha da Silva hatete, luta ba ukun aan feto mos envolve makaas. Feto alun envolve iha vida kladestina no balun iha diplomata hamutuk ho mane sira, too ikus Timor -Leste hetan ukun rasik an.
“Tempu agora Timor- Leste hetan ukun rasik an ona dezenvolve konta mos ho feto, tanba nee feto sira presiza prepara aan ho diak, nunee hamutuk ho parseru mane hodi dezenvolve rai nee ba oin,” dehan Martinha ba STL, iha nia hela fatin, Kolmera, Dili, Kuarta (14/01/2026).
Hanesan Feto Potensia, Martinha enkoraza feto sira atu envolve aan iha formasaun oin oin, nunee hasae kapasidade hodi bele partisipa iha konstrusaun estadu.
“Kapasitaan nee importante tebes, tanba nee aproveita tempu neebe mak iha hodi envolve aan iha atividade hotu, nunee hamutuk ho mane dezenvolve nasaun nee ba oin,” dehan nia.
Iha parte ketak, Emprezaria Nasional, Luciana de Carvalho hatete, tempu uluk mane deit mak partisipa iha atividade publiku, maibe ohin loron feto ho mane iha direitu no obrigasaun neebe mak hanesan, atu partisipa iha atividade hotu inklui mos foti desizaun rasik.
(car)
