DILI, STLTIMORLESTE.com – Tempu luta feto sira hatudu barani hamutuk ho mane maluk sira luta ba ukun rasik aan, ohin loron ukun aan feto foin-sae sira nafatin banati tuir eroina sira nia luta, hodi partisipa iha prosesu dezenvolvimentu nasaun.
Lia hirak nee hatoo husi Feto Potensia, Maria Amaral ba jornalista STL iha nia knaar fatin Kaikoli, Dili, Kuarta (03/04/2025).
Nia hatete, husi istoria luta hakerek iha istoria laos mane deit, maibe feto lubuk ida neebe hatudu sira nia barani hamriik hamutuk ho mane hodi luta kontra inimigu ikus lori rai nee ba hetan ukun rasik aan.
“Ohin loron Timor hetan ukun rasik aan hamriik mesak hanesan nasaun Republika Demokratika Timor Leste, nee tanba kontribuisaun husi ita nia asuwain sira neebe la tauk mate hodi raan no ruin hodi sosa ukun rasik aan, ho ida nee hanesan feto nafatin husu ba feto hotu ita nasaun lao tuir eroina sira nia ain fatin hodi partisipa iha prosesu dezenvolvimentu nasaun,” katak nia.
Tuir nia, haree ohin loron feto lubuk ida mak iha matenek no kapasidade hodi kompete ho mane sira, balu kaer ona knaar importante sira hanesan sai ministra, Visi Ministra, Sekretariu Estadu, Diretora no seluk tan, balun mos iha kapasidade maibe seidauk hetan oportunidade.
“Uluk ita ita nia maluk sira luta lori rai ba ukun aan, agora luta oinsa lori rai nee ba oin, hanesan baibain ema dehan nasaun ba oin presiza feto ho mane,” katak nia.
Nunee mos Akademista Judite Dias hatete, tempu luta feto sira hatudu ona sira nia barani hamutuk ho mane maluk sira luta makaas la tauk mate, ikus rai nee hamriik mesak, agora feto nafatin luta makaas hamutuk ho mane lori rai nee ba dezenvomvimentu sustentavel.
“Maske numeru feto sei menus maibe ho esforsu neineik feto sei barak, tanba nee labele lakon vontade,” katak nia.
Nia hatete, save importante mak estuda no kontinua aprende, bainhira aprende ona labele moe atu kompete, tanba lei rasik mos garante katak feto ho mane iha direitu no obrigasaun neebe hanesan.
Aleinde nee Prezidente Republika José Ramos Horta nia haree feto Timor Leste barak matenek liu mane no feto iha kapasidade diak kompara ho mane sira.
(eme)
