DILI, STLTIMORLESTE.com – Nasaun ba oin presiza mos feto, tanba nee husu feto nafatin esforsu aan hodi duni tuir mehi neebe mak iha.
Lia hirak nee hatoo husi Koordenadora ba Servisu Komunikasaun Sosial (SKS) Prezidensia Republika, Lídia Assunção das Neves ba STL liu husi telefone, Tersa (29/10/2024).
Nia hatete, feto nafatin fiar iha poder tanba nee mak husu feto luta ba determinasaun.
“Feto Nafatin fiar iha poder, poder iha liman husu luta ba determinasaun, hatoo mensajen ba feto sira atu esforsu aan luta ba oin,” katak nia.
Nia hatutan, feto mos iha direitu hanesan mane, tanba nee mak husu feto sira kontinua esforsu aan hodi lao ba oin.
“Fiar iha poder neebe iha imi nia liman, luta ho determinasaun ba imi nia direitu sira no ba espasu ka fatin neebe imi merese iha sosiedade. Kada esforsu konta no kada pasu neebe imi fo sei haforte liu tan, laos imi deit maibe komunidade hotu hamutuk, ita bele inspira iha mudansa signifikativa no konstrui futuru ida neebe hanesan ba ema hotu, labele desiste mundu presiza imi nia forsa no imi nia lian. Ba oin nafatin iha imi nia luta no buka tuir nafatin imi nia mehi sira,” katak nia.
Nia hatutan, feto sira atu bele sai ativu liu tan liu husi asaun sira hanesan buka formasaun no aumenta konhesimentu, partisipa iha kursu no formasaun sira neebe dezenvolve abilidade profisional no pesoal partisipa iha grupu no organizasaun sira neebe promove direitu feto nian no iha igualdade ba jeneru.
Nunee mos Caetano Jose Freitas hanesan mos Funsionariu Publiku iha Gabinete Pro-Reitoria Desenvolvimento Infrastrutura UNTL, iha Departamentu PMU (Project Management Unit) husu feto sira nafatin esforsu aan hodi lao ba oin nunee bele lori mudansa iha futuru.
“Ba feto sira, hanoin katak ita boot iha kbiit estraordinariu. Nunka laran rua-rua atu koko no luta ba futuru ida neebe diak liu. Etapa kiik idak-idak neebe ita boot halo lori mudansa boot sira. Fiar iha ita nia aan, hasoru dezafiu sira no kontinua lao ba oin. Ita boot nia mehi sira iha folin, no ho aten barani no servisu makaas, ita boot bele atinji sira. Lao nafatin, tanba mundu presiza ita boot nia forsa,” katak nia.
(eme)
