DILI, STLTIMORLESTE.com – Koordenadora iha Diresaun Servisu Sosiedade Sivil no Asuntu Sosial, Prezidensia Republika, Teresa dos Santos Ximenes hatete, feto nia idade kiik la sai sasukat atu sai lideransa, maibe bainhira iha skil no matenek bele lidera saida deit.
Nia husu feto sira neebe idade sei natoon labele moe atu kompete iha area saida deit, tanba idade la sai sasukat, importante iha kapasidade atu lidera.
“Mensajen ba hau nia feto maluk sira, idade laos sasukat ba lideransa, se ema seluk bele lidera, tanba sa ita labele? labele moe no tauk atu lidera, fiar ita nia aan katak ita feto mos bele,” dehan Teresa ba STL iha nia knaar fatin palasiu Prezidensial, Nicolau Lobato, Bairo Pite, Dili, Segunda (21/04/2025).
Iha biban nee nia mos husu feto sira atu nafatin kapasita aan liu husi partisipa formasaun oin-oin hodi bele hasae kapasidade no lee barak nunee bainhira hetan oportunidade ruma labele tauk atu lidera.
“Ita feto sira mos tenke ativu iha atividade hotu, tuir formasaun ruma, lee barak husi matenek nain sira no husu barak hodi nunee bele iha konhesimentu klean liu tan,” katak nia.
Nunee mos ba sira neebe iha ona kapasidade no esperiensia maibe seidauk hetan oportunidade ruma labele lakon esperansa, buka aprende nafatin no koko hakaas aan bainhira iha kompetisaun ruma bele kompete.
“Ba hau nia feto maluk sira iha Timor laran tomak neebe mak seidauk iha oportunidade, labele lakon esperansa, esforsu nafatin, halo orasaun, estuda makaas hodi nunee bele hetan oportunidade tuir mai iha futuru,” katak nia.
Nunee mos tuir Feto Potensia Maria Amaral katak, se bainhira feto mak kaer kargu ruma atu lidera iha instituisaun ruma sei iha mudansa, tanba feto hatene maneza no feto servisu ho fuan la ho ego.
“Ezemplu kiik sira iha lideransa suku, maske feto sira servisu ho nonok maibe iha mudansa iha suku laran, tanba nee bainhira feto mak kaer pozisaun importante ruma sei iha mudansa,” katak nia.
Nia mos husu feto sira labele tauk no moe atu kompete ho mane sira iha kualker atividade, tanba lei mos garante katak feto ho mane iha direitu no obrigasaun neebe hanesan atu kompete iha fatin neebe deit, importante iha duni kapasidade no mentalidade diak atu lidera.
Entretantu Prezidente Republika, Jose Ramos Horta nia haree mos katak, feto iha matenek no kapasidade neebe diak liu mane sira.
Prezidente Republika hatete, tuir nia haree feto barak mak iha kapasidade atu lidera no feto barak sai lideransa neebe diak, no feto nia servisu ho nonok maibe rezultadu diak kompara ho mane sira.
(eme)
