DILI, STLTIMORLESTE.com – Prezidente Republika (PR), Jose Ramos Horta hatete, Governu nafatin iha kompromisu atu avansa ba Igualdade Jeneru no Empodera Feto, tanba feto nia luta hamriik nuudar airin ba forsa reziliensia iha sosiedade.
Xefe Estadu hatoo kestaun nee liu husi nia mensajen Kuarta nee (06/11/2024) ba Feto iha Timor laran tomak neebe selebra Loron Nasional Feto ba dala 48, ho tema “Feto iha Prosesu Dezenvolvimentu Nasional Hafoin Tinan 25 Konsulta Popular”.
“Iha selebrasaun ida nee ita fo onra ba espiritu estraordinariu no kontribuisaun importante husi feto Timoroan sira neebe sai ona instrumental hodi forma ita nia nasaun nia destinu. Husi luta ba independensia too servisu neebe lao hela atu harii ita nia nasaun demokratiku, feto sira hamriik nuudar airin ba forsa, reziliensia no progresu iha ita nia sosiedade,” katak PR, Horta.
Prezidente Republika hatete, iha selebrasaun loron feto nee hanoin mos feto nia kontribuisaun ba luta ukun rasik aan. Ho agradesimentu klean sakrifísiu feto kombatente libertasaun sira neebe luta hamutuk ho sira nia omologu mane sira ba independensia. Sira nia korajen no determinasaun kontinua inspira jerasaun foun feto Timoroan sira neebe oras nee lidera iha setor oin-oin, husi governu no edukasaun too negosiu no agrikultura.
“Bainhira ita marka loron importante ida nee ita tenke rekonhese ita nia susesu no dezafiu sira neebe sei iha. Ita nia nasaun mantein nafatin kompromisu atu avansa igualdade jeneru no empoderamentu feto nian iha area moris hotu-hotu. Ita halo ona progresu importante iha aumentu partisipasaun feto nian iha polítika, ho persentajen aas liu ida kona-ba feto iha parlamentu iha rejiaun Ázia-Pasífiku,” hatete Xefe Estadu.
Maibe nia dehan, tenke kontinua servisu hodi elimina violensia bazeia ba jeneru, asegura asesu hanesan ba edukasaun no saude no kria oportunidade ekonomika barak liu tan ba feto sira, liu-liu iha area rural.
“Ba feto Timor Leste, ita nia inan, bin, feton no líder sira, imi nia forsa, matenek no dedikasaun mak fundamentál ba ita nia nasaun nia dezenvolvimentu no prosperiedade. Matenek tradisional neebe ita boot sira prezerva, família sira neebe ita boot sira hakiak no komunidade sira neebe ita boot sira harii mak fundasaun ba ita nia sosiedade. Ba ita nia foinsae feto no labarik feto sira, hau dehan mehi boot no buka tuir imi nia aspirasaun sira ho determinasaun. Ita nia nasaun apoia imi, no imi nia potensial laiha limite,” hatete Horta.
(eme)
