DILI, STLTIMORLESTE.com – Komemorasaun aniversariu Rede Feto Timor Leste ba dala 25, aumezmu tempu selebra mos loron Feto Internasional ho nia tema “Ba Feto no Labarik Feto Sira Hotu: Direitu. Igualidade. Hakbiit”.
Prezidente Rede Feto Timor Leste, Zelia Fernandes haktuir, iha parte importante husi komemorasaun ida nee liu-liu komemorasaun loron Internasional Feto no 25 anos ba fundasaun Redi Feto TL, rokonhese katak feto nia papel no kontribuisaun importante tebes.
“Ita hatene katak feto nia papel importante tebes ba iha prosesu dezenvolvimentu ba rai no povu ida nee nian, realidade hatudu momos katak feto nia papel importante iha prosesu luta libertasaun, feto mos tenke esforsu nafatin hodi kontribui ba dezenvolvimentu inkluzivu no sustentavel,” dehan dehan Zelia wainhira halao serimonia selebrasaun Rede Feto ba dala 25 iha Salaun Apuramentu CNE, Dili, Tersa (11/03/2025).
Nia dehan, ezistensia 25 anos Rede Feto TL nuudar reflesaun importante ba ema hotu no ba labarik feto sira iha mundu tomak liu-liu ba iha feto Timor Leste.
“Komemorasaun ba loron ohin ba loron Internasional Feto ba tinan ida nee nomos selebrasaun 25 anos Rede Feto TL nuudar reflesaun importante ba inan feton no labarik feto sira iha mundu tomak liu-liu iha TL, ba susesu no dezafius neebe ita hasoru iha ita nia jornada ida nee”, katak nia.
Iha fatin hanesan, Sekretariu Estadu Igualidade Interinu, Expedito Dias Ximenes hatutan, loron Internasional Feto hanesan global kona-ba feto nia susesu no apelu ba igualidade jeneru ba feto iha kontribuisaun neebe boot liu iha ambitu moris too mate .
(EST 3)
