DILI, STLTIMORLESTE.com – Koordenadora iha Diresaun Servisu Sosiedade Sivil no Asuntu Sosial iha Palasiu Prezidensial Republika, Teresa dos Santos hatete, feto presiza hakaas aan liu husi tuir ka partisipa iha formasaun oin-oin hodi bele hasae kapasidade, nunee bainhira hetan oportunidade ruma labele tauk.
“Husu ba feto iha Timor laran tomak katak tenke esforsu aan hodi hakat ba oin, tanba nasaun ba oin presiza feto no mane nia partisipasaun no labele mos haree ba idade sai sasukat ba lideransa,” dehan Teresa ba STL, iha Palasiu Prezidensial, Nicolao Lobato, Bairru Pite, Dili, Kuarta (13/08/2025).
Nia mos enkoraza feto sira labele moe no tenke fiar aan katak ema seluk bele, nia mos bele motiva aan hodi lao ba oin,”Mensajen ba hau nia feto maluk sira idade laos sasukat ba lideransa, se ema seluk bele lidera, tanba sa ita labele, labele moe no tauk atu lidera, fiar ita nia ann katak Ita feto mos bele ita feto sira mos tenki aktivu iha aktividade hotu, tuir formasaun ruma, lee barak husi matenek nain sira no husu barak hodi, nunee bele iha konhesimentu klean liu tan,” katak nia.
Teresa husu ba feto maluk seluk neebe mak seidauk hetan oportunidade, labele lakon oportunidade maibe nafatin esforsu aan hodi hein oportunidade.
“Ba hau nia feto maluk sira iha Timor laran tomak nebe mak seidauk iha oportunidade, labele lakon esperansa, esforsu nafatin, halo orasaun, estuda makas hodi nune bele hetan oportunidade tuir mai iha futuru,” dehan nia.
Nunee mos Feto Potensial, Merlinda Soares Pinto hatutan, feto labele tauk no moe atu kompete aan iha kualker atividade, tanba feto mos direitu hanesan ho mane hodi hola parte iha atividade saida deit.
Maibe feto presiza sai ativu no kontribui liu tan iha dezenvolvimentu nasional, atu ativu diak liu presiza hasae kapasidade (Empowerment) iha area edukasaun.
Nunee mos Diretora FOKUPERS, Domingas Afonso Amaral hatete, tuir ohin lorton feto sira ativu ona iha atividade oin oin,no komesa mos empoderada iha hakbiit ekonomia mos.
(eme)
