DILI, STLTIMORLESTE.com – Papel feto importante tebes iha area hotu, tanba feto mak sai alvu ba dezenvolvimentu nasional iha rai laran.
Kestaun nee hatoo husi Eis Prezidente Autoridade Munisipiu Dili, atual Profisional Senior Ministeriu Administrasaun Ministeriu Interior. Guelhermina Filomena Saldanha ba jornaslista sira, iha salaun UCT Balide Sesta (22/08/2025) hatete, lei mos fo ona dalan liu liu lei eleitoral katak buat hotu hotu neebe halo eleisaun sempre 30% ba feto nee hakarak ka lakohi tenke feto, hau haree partidu politiku sira mos bainhira sira nia estrutura iha baze sira sempre dehan tenke iha resprezetasaun feto, iha fatin barak mos haree sira sempre fo oportunidade feto lidera se lasai kordenador visi nee sempre ita bele dehan katak nee diak tebes.
“Ba iha partidu politiku ba iha Parlamentu iha neeba lei asegura 30% tenke feto, se feto ida mak husu subtituisaun automatikamente feto mak ba nee kapaas ona maibe iha administrasaun publika susar oituan, ida nee bele dehan dezafiu laos feto mak hakarak dezafiu nee tenke hetan konsolizasaun husi mane nuudar parseru bainhira hakarak feto sai albu ba dezenvolvimentu,” katak Guilhermina.
Feto Potensial nee husu ba foinsae feto sira nafatin hasae kapasidade, hodi bele inklina aan iha atividade hotu tantu husi nasional internasional.
“Husu ba feto maluk sira liu liu ba alin joven sira kontinua aumenta kapasidade kontinua prontu bainhira ema hili karik ba tuur iha fatin ruma atu sai hanesan lideransa, la presiza sai lideransa boot sai hanesan Xefe Aldeia mos labuat ida nee oportunidade ita atu aprende, tanba husi Xefe Aldeia ita komesa ukun ona aldeia atu nunee ita bele iha esperensia too Prezidente Autoridade too fali Prezidente Republika,” katak Eis PAM Dili nee.
Nia dehan, feto labele minimiza rasik, bainhira hetan oportunidade labele dehan katak labele, ou laen lakohi, labele hanoin nunee, maibe agora era ukun ninia feto mane direitu hanesan importante iha komfiansa ba malu apoiu malu.
“Papel ba ita nakloke, maibe dezafiu entre feto mos hanesan nee kuandu feto ida mak sae ida seluk dehan ou nia sae ona nee labele ida nee mos dezafiu, neebe feto maluk sira hasoru labele haree nia hanesan se maibe haree nia hanesan feto apoiu nia katak, nia hau nia feto maluk, problema pesoal gosta ka la gosta nee problema seluk maibe nia ba reprezenta feto,” katak nia.
Nia hatete, bainhira feto ida assume kargu ida mak feto maluk seluk hatete nia labele, ida nee minimiza rasik feto maluk nia kapasidade. Tanba nee direferente partidu laiha problema importanta koalia jeneru nafatin apoiu malu.
Nunee mos Deputada Bankada FRETILIN, Lidia Norberta dos Santos Martins hatutan, feto bele partidu ketak ketak, maibe konaba assuntu feto presiza apoiu malu.
“Feto neebe mak iha kapasidade ita tenke rekonhese katak nia iha kapasidade, feto neebe mak laiha kapasidade tanba deit katak feto tenke apoiu entau ita kontribui hela ba buat neebe lalos, nia loos mak nee buka halo sentidu kritiku nunee ida neebe mak seidauk kapasita aan bele kapasita aan,” katak Deputada nee.
Deputada nee husu feto sira nafatin esforsu aan hodi kompete iha area saida deit, tanba feto sai albu ba dezenvolvimentu Nasional, no sira uluk sira kapasidade naton maibe hatudu ona brani husi sira nia luta inspira foinsae sira agora hodi ativu iha dezenvolvimentu Nasional.
(eme)
