DILI, STLTIMORLESTE.com – Feto tenke forte iha familia, sosiedade no vida profisional, no rezilente hasoru dezafiu saida deit iha vida moris loron-loron.
Kestaun nee hatoo husi Delia dos Santos, Postu Sargentu Xefe nuudar Membru PNTL neebe destakadu iha Casa Militar Prezidensia Republika, liu husi nia mensajen ba feto neebe STL asesu husi media Prezidensia Republika, Tersa (04/11/2025).
“Feto Timor Leste uza oportunidade atu aprende no sai feto forte iha familia, komunidade, no vida professional. Feto forte deit sei naton, maibe tenke sai rezilente atu metin sobrevive hasoru dezafiu saida deit,” dehan Delia.
Alende nee iha selebrasaun loron Nasional Feto Timor-Leste ba dala 49 ho tema Feto Timor Leste Selebra O Nia Direitu, Igualdade no Opportunidade, Prezidensia Republika selebra no fo konese figura feto inspiradora sira iha Prezidensia Republika.
Delia dos Santos, ho postu Sargentu Xefe nuudar Membru PNTL neebe destakadu iha Casa Militar Prezidensia Republika hahu husi 2016 ate agora.
Sargentu Xefe Delia dos Santos halao papel importante rua, iha familia, nuudar inan tau matan ba oan no membru família sira seluk.
Iha serbisu fatin, nia asumi knaar iha Servisu Apoiu ba Xefe Casa Militar, hodi halao serbisu administrativu, fo asistensia ba nukleu sira iha Casa Militar, no iha okaziaun balun halo servisu nuudar Adjudante Kampu ba Sua Exelensia Prezidente Republika.
Maske hasoru dezafiu ba tempu neebe limitadu ba família no vida servisu neebe pontual hodi ezekuta orden servisu foun sira, ho kompreensaun husi família no traballu ekipa iha servisu fatin, nia konsege halao papel rua nee ho responsabilidade.
Istoria Sargentu Xefe Delia dos Santos hanesan espellu ba forsa no determinasaun feto Timor-Leste. Nia mostra katak, ho reziliensia no apoiu, feto ida bele sai metin iha area tradisionalmente dominadu husi mane, halao nia knaar nuudar profisional diak, no nafatin manten nia papel fundamental nuudar pilar iha família.
Nia istoria mak istoria direitu, igualdade no oportunidade neebe laos deit termu iha lei, maibe realidade neebe bele hetan ho tempu.
Nunee mos asesora Media Prezidensia Republika, Francisca Maia Gonçalves hatete, feto nia lian mak sai forsa.
“Ita nia lian mak ita nia forsa. Hodi komunikasaun, feto Timor Leste bele defende ninia direitu, hadia ninia oportunidade, no kontribui ba harii nasaun ida neebe promove igualdade,” dehan Cisca.
Francisca “Cisca” Maia Gonçalves nuudar exemplu ida neebe refleita forsa, reziliensia no determinasaun feto Timor-Leste nian. Nia kareira hahu iha 1997 nuudar tradutora ba jornalista internasional sira durante momentu istoriku no difísil iha Timor-Leste nia istoria. Iha tempu neeba, nia realiza katak komunikasaun laos deit kona-ba tradus liafuan maibe lia loos kona-ba esperansa, tauk, no luta ba direitus umanus.
Jornalista: Emerenciana Pinto
Editora: Domingas Gomes
