DILI, STLTIMORLESTE.com – Feto nia luta tama iha dimensaun foun no koletiva, no feto tenke iha poder ba ekonomia no sai kampiaun iha negosiu hodi bele redus violensia iha familia.
Kestaun nee hatoo husi Ministru Komersiu no Industria, Filipus Nino Pereira liu husi nia diskursu iha Salau Rede Feto Kaikoli Tersa (05/11/2024).
Nia hatete, luta feto tama iha dimensaun foun ida koletivamente, ida nee sai responsablidade ema hotu nia, tanba se hateke ba futuru servisu lubuk ida hotu-hotu tenke halo konserteza ho Timor Leste nia ligasaun ba mundu nee mos lori implikasaun boot liu-liu iha parte ekonomia.
“Hau aseita ohin loron ita koalia kona-ba feto tenke iha poder iha ekonomia feto tenke sai kampiaun iha negosiu, rezultadu iha tiha ona ita haree sira sai emprezaria bobot ou politiku bobot deit, maibe ita haree kiik sira neebe tutur hela sanan ou tutur hela sasan todan husi sira nia hela fatin ba fatin seluk atu faan deit sasan ida ou produtu ida laos lori deit sasan, maibe lori mos sira nia oan, nee esforsu neebe ita nia inan feton sira halo para aisuar iha dapur nee kontinua moris, ida nee sira hola responsablidade boot liu duke sira nia parseiru sira nia laen,” katak Ministru.
Ida nee hamosu orgulhu boot ida no ida nee mos luta naruk ida no luta nonok kleur mak feto maluk sira halo para kontinua haforsa sira nia moris loron-loron para kontinua ba futuru oan sira para hetan tratamentu neebe mak diak.
Ministru dehan, ida nee mos espasu diak ida para fo oportunidade ho tempu neebe mak diak nunee ema hotu mos bele halo no halao kontribui direitamente ba hakbiit feto.
“Dala ruma iha ita nia kakutak temi katak buat ida hakbiit feto ba projetu nee ita halo hodi hasai foto tau relatoriu ba iha doador sira no doador sira mos iha tan seluk tan, maibe ninia esensial neebe mak importante mak hakbiit lo-loos mak oinsa nee tenke too ida auto sufisiente nee katak empodera feto mak ida nee, tanba nee mak hakbiit laos sai hanesan projetu deit, maibe ida nee tenke ho komitmentu tomak,” katak Ministru.
Nia hatutan, nafatin hamutuk hodi kapasita feto sira liu husi advokasia no governu mos nafatin apoiu liu husi advokasia ho lei oin-oin neebe fo nafatin protesaun inklusivamente ba feto.
Nunee mos Embaixador Uniaun Europeia iha Timor Leste, Marc Fiedrich hatete feto sira nia direitu ba partisipasaun ekonomika bele ajuda rezolve relasaun sira neebe laiha balansu neebe eziste.
“Porezemplu bainhira mane sira uza sira nia propriedade ba rai, ba kapital, ka ba makina sira nuudar dalan ida atu reforsa sira nia dominasaun ba sira nia feen, ka ba feto sira seluk neebe haleu sira. Ida nee la justu no ida nee perpetua injustisa sira neebe eziste. Atu hateten buat neebe klaru feto sira mos tenke iha asesu ba poder ekonomiku,” dehan Embaixador.
Embaixador dehan, bainhira mane no feto partisipa no kontribui presiza Timoroan idak-idak atu kontribui atu kuda produtu sira, atu prosesa no faan, atu dezenvolve nasaun no garante empregu.
Nia hatete, bainhira feto sira iha kbiit ekonomiku, sira nia família mos hetan benefísiu. Entaun benefísiu sira neebe feto sira hetan iha tendensia atu fahe ho luan liu, liu liu ho sira nia oan sira, labarik feto no mane sira neebe maka futuru ba nasaun ida nee.
Nunee mos Reprezentante Adra Timor Leste, Sanjay mathey hatete, projetu hakbiit feto ADRA TL hamutuk ho parseru rede feto fo formasaun oin oin ba grupu feto sira iha munisipiu 4 liu husi implementasaun programa kampu ba agrikultura sira rai no imprestimu osan formasaun bazika kona-ba literaria no negosiu no fornesementu ekipamentus prosesamentu nia.
(eme)
