DILI, STLTIMORLESTE.com – Freedom Faithnet Global (FFG) servisu hamutuk ho Servico de Tranfusao de Sangue (STS) Hospital Nasional Guido Valadares (HNGV) Dili realiza asaun doasaun ran hodi ajuda ema seluk neebe presiza raan. Asaun doasaun raan halao iha Andar 1 Timor Plaza, Dili, Domingu (6/7/2025).
Aktividade doasaun raan ho tema “Give Blood, Give Hope Together We Save Lives” partisipa hosi ema atus resin mai husi Timoroan nomos ema estranjeiru neebe hela iha Timor Leste volutariumente fo sira nia ran ba ema neebe presiza ran liu hosi Servico de Tranfusao de Sangue Hospital Nasional Guido Valadares.
Koordenadora aktividade doasaun ran, Maria Karlos alias Mami ba STL hatete katak objetivu husi asaun doasaun ran nee atu ajuda ema sira neebe presiza raan.
“Ami realiza aktividade doasaun ran nee atu fo kontribuisaun ba ema neebe presiza ran. Ita oferese ita nia ran ba ema neebe ita la konhese nomos ema neebe presiza ran nee mos la konhese ran nee mai hosi se. Maibe, aktividade hanesan nee ita halao tanba ita nia sentimentu umanu katak buat neebe Maromak fo ita gratuita, ita mos fo ba ema seluk ho gratuita,” dehan Maria.
Nia mos dehan katak atividade doasaun ran ida nee hanesan atividade ran rutina neebe sira halo kada fulan haat (4) dala ida ho objetivu ida katak oferese raan ho vuluntariumente atu halo ema hotu nia moris diak liu tan.
“Ami agradese tebes ba Timor Plaza neebe fo ona fatin gratuita ba ami hodi halao atividade doasaun ran,” hatete Maria.
Nia dehan, atividade doasaun raan nee apoiu husi Banku Mandiri, Telkomcel, Pertamina Internasional Timor, BRI, ROCK, Servisu Tranmisaun Sangue Timor Leste, Cruz Vermelha Timor Leste, WHO, Lidwi, Sylvia Dili, Jatim Food, ANL, Timor Plaza, Mitramor, Yellow, TOP, CINI Farmacia, Bravo Internasional, Bintang Fajar, LDA no Natural Miniral Water Timor Leste.
Entretantu, Xefe Departamentu Banku de Sangue Timor Leste, doutor Alex Mendonca, hato’o agradese ba grupu FFG neebe organiza asaun doasaun ran iha Timor Plaza no maluk barak mak oferese sira nia raan atu ajuda ba maluk sira neebe moras iha HNGV Dili.
“Ita nia ran truk ida bele salva ema nia vida. Tanba nee, aktividade doasaun ran nee importante tebes tanba ligasaun ho ema nia vida. Hosi ita nia voluntariumente oferese ran nee bele ajuda maluk sira neebe agora moras hela ou halo operasaun presiza ita nia ran. Ho nunee ita bele salva sira nia vida,” hatete Alex.
Nia dehan ran neebe maluk sira oferese voluntariumente liu hosi aktividade doasaun raan nee bele ajuda ema lubuk neebe presiza ran. Tanba nee, lori ekipa Departementu Banku de Sangue nia naran hato’o agradese ba maluk sira neebe voluntariumente oferese ona sira nia ran ba maluk sira neebe presiza ran.
“Tuir regras neebe iha atividade hanesan nee halao fulan tolu dala ida ba mane no fulan tolu dala ida ba feto. Ami agradese ba grupu FFG nian neebe organiza asaun doasaun ran nee iha Timor Plaza no atividade neebe sira halo nee tulun tebes ba maluk sira neebe presiza ran hodi salva sira nia vida,” nia realsa.
Tuir nia, doasaun raan nee importante tebes, tanba ran la faan iha loja ka merkadu, maibe ran nee mai husi ema neebe ho fuan voluntariumente oferese ba maluk sira neebe presiza ran.
“Ami husu ba Governu no instituisaun hotu-hotu bele halao atividade hanesan nee, tamba raan nee importante tebes ba ema neebe presiza ran. Durante nee ema neebe oferese raan barak nee mai husi familia pasiente sira. Husi governu no institusaun privadu sira menus los,” katak Alex.
Iha fatin hanesan, Madre Clementina Manurung husi Kongregasaun KYM hato’o mos agradese ba maluk sira neebe oferese sira nia ran ba ema nee presiza ran. “Ami hakarak oferese ami nia ran hodi tulun ba ema neebe presiza ran. Ho aktividade doasaun ran nee bele ajuda ema neebe presiza ran nomos liu hosi doasaun ran nee bele salva ema nia vida,” katak Madre Clementina.
Tamba nee, nia husu ba maluk sira hotu atu oferese sira nia ran ba ema neebe presiza ran, tanba atividade hanesan nee ligadu ba umanu hodi tulun ba malu no salva ema nia vida. “Atividade volutariumente oferese ran hanesan nee atu tulun ba malu. Ita nia ran truk ida bele salva ema nia vida,” dehan Madre Clementina.
Tuir observasaun STL nian iha terenu hatudu katak atividade asaun doasaun ran nee anima ho muzika no kanta husi Grupu Burung Kakatua (GDK)-Grupu Defisiensia Kreatividade neebe hamahan an husi Banku Mandiri Timor Leste.
(mik)
