DILI, STLTIMORLESTE.com – Federasaun Futebol Timor Leste (FFTL) sei realiza uluk kongresu estraordinariu hili komite independente, hodi prepara ba segundu kongresu estraordinariu hili Prezidente FFTL iha fulan Dezembru.
Sekretariu Jeral Federasaun Futebol Timor Leste, Gregorio Coreia hatete, kongresu ida nee ema bolu kongresu segundu estraordinariu ba Federasaun Futebol Timor Leste, tanba kongresu uluk liu ba iha dia 10 Janeiru nee la konsege realiza too fim, entaun agora prepara para hodi realiza fali.
“Ita prepara para hili ita nia komite independente sira nee hodi prepara ba fulan Dezembru, mai ita halo segundu kongresu estraordinariu, tanba eleisaun Prezidente FFTL no membru ezekutivu neebe rezigna aan,” dehan Gregorio ba jornalista sira iha nia knaar fatin FFTL, Dili, Kinta (24/10/2024).
Nia dehan, karakter kongresu ida nee la hanesan, tanba ida nee hili komite independente, Dezembru mai hili Prezidente membru ezekutivu ida neebe natoon rezigna aan.
Komite independente nee anunsiu ba Asosiasasaun hotu-hotu sira mak hili mai iha nee, kuandu ezekutivu desidi hodi lori ba kongresu.
“Laos membru ezekutivu deit, ita sei haruka ba FIFA ho AFC kriteria sira nee, ema sira neebe konkore ona entaun ida nee mak ita lori ba kongresu,” dehan nia.
Nia hatutan, ekipa independente nee laos Federasaun mak hili husi membru Asosiasasaun hotu-hotu mak hatama lista mai sira nee haree verifika tuir kriteria ka lae, haruka ba FIFA ho AFC haree kuandu diak ona entaun bele tama ona ba lista kandidatu neebe kongresu mai atu hili. Komite independente nee nain 10 depois iha kongresu mak sei halo eleisaun.
Entretantu kongresu hili komite independente sei realiza Iha Sabadu agora.
(mar)
