DILI, STLTIMORLESTE.com – Padre Benedictus Nuva, CMF hatete, fiar lo-loos mak Jesus moris hias ona husi mate, tanba wainhira Jesus mate la moris hias mak ita nia fiar iha mundu nee sei laiha folin, nunee ita fiar tenke hadomi mos Maromak nia liafuan sira neebe mak hanorin ona mai ita.
“Ita agradese ba Maromak, tanba ita nia fiar lo-loos mak Jesus moris hias, tanba wainhira Jesus mate la moris hias karik ita nia fiar ohin loron la iha folin, ita nia hamutuk loron-loron ba igreja selebra loron paskua, selebra festa natal laiha folin ida,” dehan Padre Beneditus Nuva, CMF hafoin prezide misa Domingu resurreisaun iha Parokia Aimutin, Domingu nee (20/04/2025).
Padre Beneditus esplika, fiar ba Jesus maske la haree, maibe rona Maromak nia liafuan liu husi evanjelhu sira no liu husi apostolu sira neebe mak hakerek tiha ona, fiar nee tenke hadomi mos Maromak nia liafuan, liu husi Maromak nia liafuan sira hodi tama iha ita nia fuan atu ita bele haree Jesus neebe moris hias.
“Hau nia hanoin no iha fuan, hau nia neon no klamar tomak hatete katak Jesus moris hias, tuir apostolu, tanba ita rona nia liafuan liu husi eskolante no apostolu sira, eskolante nain sanulu resin ida nee sira haklaken katak Maromak moris hias ona, Pedro hanesan ema neebe mak dehan Jesus mate ona, ami laiha ona mestre, oinsa Jesus bele halo buat ruma iha mundu nee,” katak padre Benedictus.
Nunee, wainhira Jesus moris hias sira hetan kbiit atu haklaken katak sira hamutuk ho Nia, ida nee mak ita nia fiar neebe mai husi apostolu sira ba iha rate Jesus laiha, maibe nia fiar duni Jesus koalia, tuir eskritura ita haree katak Jesus hatete duni katak nia sei moris hias.
Mezmu nunee, ema neebe mak tuir Jesus, lo-loos nee mak primeiru apostolu sira, tanba sira haree duni no rona saida mak Jesus hateten, hanesan ema kristaun ohin loron nian, Jesus moris hias, iha tinan rihun ida ona ema balun rona dehan hau mos hakarak tuir tanba dook tiha ona, se ita nia tilun atu rona Maromak nia liafuan sira.
“Ida nee mak mensajen mai ita, Jesus moris hias atu ita hotu bele fiar duni ho laran no fiar ho forsa tomak, ida nee mak fiar lo-loos nian, maibe ita dehan deit hau fiar, nee fiar neebe mak la tama duni ba ita nia moris tomak,” katak nian.
Hanesan eskolante no apostolu sira haree Jesus moris hias, iha buat ruma iha sira nia fuan atu sira bele haklaken saida mak Jesus hanorin ba sira atu sai sasin iha mundu tomak, ita hotu sai sasin ba Jesus nia domin iha mundu nee, ita prontu sai sasin, signifika katak ita sai sasin iha ita nia familia, iha servisu fatin no iha fatin neebe mak ita hela ba.
(EST 2)
