DILI, STLTIMORLESTE.com – Moris iha mundu la ses husi problema no dezafiu oin-oin, maibe Jesus husu ema hotu nafatin fiar iha Nai no matan moris neon nain nafatin, tanba Maromak la husik ema neebe laran metin iha Nia.
Kestaun nee hatoo husi Padre Richardo Pasang, SVD liu husi nia reflesaun loron Tersa (22/10/2024).
Padre dehan, iha reflesaun ba loron ohin nia koalia kona-ba hanoin ema matan moris neon nain. Semana XXIX du Tempu komum Ef 2 : 12 – 22 Luc 12 : 35 – 38.
“Jesus Kristu husu ba nia eskolante sira atu matan moris neon nai ho liafuan seluk kesi metin imi nia futukabun no halo imi nia ahi oan lakan nafatin. Keta baruk, keta dukur, keta relax demais ou keta toba dukur. Matan moris neon nain signifika katak responsabilidade no prontu halao knaar iha situasaun saida deit,” katak Padre Richardo.
Nia dehan, ema nafatin matan moris neon nain hodi hasoru situasaun saida deit neebe hasoru iha moris loron ba loron, tanba nee antes halao atividade hotu nafatin laran metin iha Nai no husu Nai liu husi orasaun atu akompanha ema idak Idak nia atividade.
“Ita bele imajina ema neebe sempre prontu ba knaar sira neebe presiza tebes. Doutor sira wainhira moras sira presiza. Alfandega sira wainhira povu sira presiza urjente se iha akontesimentu ruma. Policia no militar sira neebe hein fronteira. Sira tenke prontu maski situasaun diak hela. Matan moris neon nain halo ita sensivel ba situasaun neebe diferente neebe ita hasoru no antisipa atu bele hola desizaun definitive. Atitude rilex demais, toba dukur no seluk tan sei lori konsekuensia, karik ita bele sai vitima se akontese buat ruma,” dehan Padre.
Jesus sempre iha ba ema neebe fiar no laran metin ba nia, no sempre akompanha ema neebe prontu bainhira Jesus too iha sira leet.
“Jesus apresia tebes ema neebe sempre prontu no hader hela wainhira Maromak too mai iha sira leet. Nee duni, presiza hamoris atitude antisipasaun, feeling no hatene sinais do tempu nebee akontese iha ita leet. Ho nunee ita la monu iha tentasaun oi-oin mundu nee nian maibe metin nafatin iha fiar, domin no esperansa,” katak Pe. Richardo.
Padre nee hatutan, ema neebe laran metin fiar iha Kristu no halo tuir Maromak nia hanorin liu husi ukun fuan sira maski hasoru dezafiu oin oin, maibe lamonu ba tentasaun.
(eme)
