DILI, STLTIMORLESTE.com – Relasiona ho mandatu Prezidente Tribunal Rekursu (PTR), Deolindo Dos Santos besik terminna ona, Jurista konsidera katak figura neebe atu troka PTR nia fatin tenke kaer metin prinsipiu rua, kapasidade intelektual no mos independensia.
“Hau nia hanoin figura neebe atu troka Deolindo, ema neebe tenke iha kapasidade intelektual no ema neebe kaer metin independensia servisu Tribunal nian,” dehan Jurista Sergio Dias Quintas ba jornalista STL iha Kaikoli, Sesta (11/04/2025).
Nia hatutan, kriteria rua nee importante tebes hodi asegura funsionamentu Estadu Direitu iha Timor.
Nunee mos PTR tenke iha kapasidade intelektual, tanba nia nuudar imajen Estadu, karik servisu Estadu ruma neebe liga servisu Tribunal nian, Prezidente Tribunal Rekursu mak reprezenta, entaun nia tenke iha kapasidade intelektual.
Iha fatin ketak, Akademiku Universidade Nasional Timor Lorosae (UNTL), Sebastião dos Santos dehan, atu asumi kargu nuudar PTR, tenke figura neebe independente.
“Hau hanoin nomeia figura neebe independente, maibe ita nia esperansa autoridade Judisial sira mesak Timoroan, fiar katak figura neebe simu knaar nee sei halao servisu tuir lei haruka,” dehan nia.
(ter)
