BAUKAU, STLTIMORLESTE.com – Durante selebrasaun loron finadu iha Munisipiu Baukau, husi loron 01 too loron 02 Novembru 2024, situasaun lao kontroladu, tanba servisu makaas husi parte ekipa konjuntu neebe kompostu husi PNTL no F-FDTL, liu husi patrolha lao ain iha tempu kalan ba fatin tarjetu sira.
Deklarasaun nee hatoo husi Komadante Komando Polisia Nasional Timor Leste Munisipiu Baukau, Superintendente Xefe Polisia Antonio Maria De Sa ba jornalista sira iha knaar fatin Vila Nova, Segunda (04/11/2024)
“Hau hakarak hatete, durente periodu selebrasaun loron boot nee laiha konfrontasaun entre grupu ou individu balu,” nia dehan.
Komadante Munisipiu Baukau nee fundamenta, durante selebrasaun loron finadu neebe situasaun kontroladu, tanba servisu makaas husi parte ekipa konjuntu kompostu husu Polisia no F-FDTL liu husi patrolha piadas no lao ain iha tempu kalan ba fatin tarjetu sira.
Nia sublina, aleinde mos Komando Polisia destaka membru sira iha kada semiteriu, hodi garante seguransa ba komunidade sira nia movimentu ba kari aifunan no sunu lilin iha rate.
“Klaru, ita nia joven sira hatudu ona sira nia maturidade koopera tebes ho seguransa, mezmu movimentasaun barak husi Dili mai foho, maibe la rezulta konfrontasaun, ita apresia komportamentu ita nia joven sira nian,” nia akresenta.
Komadante nee deklara, mezmu iha loron 31 Outumbru 2024 parte kalan, iha area Aubaka Suku Triloka, Postu Administrativu Vila, joven balu tenta tuda karreta privadu ida husi membru FALINTIL-Forsa Defeza Timor-Leste (F-FDTL) hodi rezulta vidru oin, kotuk no parte janela liman loos nian rahun, inklui membru Polisia nain 2 husi Komando Polisia Munisipiu Baukau neebe halo atuasaun mos hetan kanek, maibe ekipa konjunta husi PNTL, F-FDTL nomos BOP konsege kaptura suspeitu nain 5 neebe daudaun rejistu ona iha Ministeriu Publiku.
(EST/2)
