DILI, STLTIMORLESTE.com – Eskola Sekundariu Jeral FINANTIL hatama ona pedidu proposta ba Ministeriu Edukasaun (ME), hodi bele halo konstrusaun foun ba sira nian eskola.
Lia hirak nee hatoo husi Diretor Eskola Sekundariu Jeral FINANTIL, Aniceto Berlelo ba STL iha nia knaar fatin Aimutin, Dili, Kuarta nee (16/10/2024).
“Ami nian proposta ida mos bazeia ba ministra aprova ami nian proposta neebe haruka ba. Hau hanoin entre ministerial nain ba ida nee klaru husi ME. Primeiru atu fo hatene katak, haree ho situasaun nee, ami nain rua neebe hetan fiar husi Ministeriu, ami hakerek tiha ona proposta ba ME no obras publiku, maibe agradese tanba ministra aprova tiha ona ami nian proposta neebe ami hatama, ho objetivu ida katak atu halo konstrusaun foun eskola FINANTIL ninia,” nia afirma.
Nia hatutan, nee duni ME ho obras publika ho sira nian proposta neebe sira hatama ona, sira bele halo diskusaun ba iha prosesu sira, tanba sira iha esperansa katak, iha tempu badak ME ho obras publiku neebe aprova ona sira nian proposta nee bele halo konstrusaun foun ba eskola ida nee, maske tinan nee la akontese, espera tinan oin bele halo konstrusaun foun.
Iha fatin la hanesan, Diretor Edukasaun Munisipiu Dili, Sabino Perreira hatete, eskola neebe sei menus sala aprendizajen no atu halo konstrusaun nee sei rezolve fazeadamente, laos atu rezolve dala ida deit, nee ita rezolve ida por ida, tanba hatene katak, too agora eskola balun sei menus sala ba estudantes sira.
“Ita haree ba orsamentu 2025 nee ME iha ona planu, liu-liu atu haree kona-ba eskola neebe iha kondisaun sala de aula neebe mak sei menus, buat sira nee mak ita sei hadia, maibe ita labele halo milagre,” nia dehan.
Entretantu, Direitor Diresaun Nasional Infraestrutura no Edukativu iha ME, Helio Lopes hatete, tanba nee halo prioridade hirak nee fazeadamente, moru talves ba tinan sira tuir mai, no agora konsentra ba fasilidade importante sira hanesan sala aula, haris fatin, instalasaun bee moos, sala profesor, iha kondisaun neebe minimu molok hakat ba konstrusaun moru.
(jac)
