DILI, STLTIMORLESTE.com – Eskola Sekundáriu Jeral (ESJ) FINANTIL sai risku ba inundasaun iha tempu udan, tanba bainhira udan la para bee tama too iha sala ensinu aprendizajen.
Lia hirak nee hatoo husi Diretur ESJ FINANTIL, Aniceto Berlelo ba jornalista STL iha nia knaar fatin Aimutin, Dili, Segunda (01/12/2025).
Nia dehan, horiseik udan boot nee la afeta ba sala ruma, maibe bee nakonu iha areador eskola nian too agora.
“Ita labele haruka estudantes sira limpeja fali, tanba nee buat natureza neebe ita labele halo buat ida. Nee duni ami nian areador eskola mak bee nakonu no sala lae. Maibe bainhira udan la para, nee bee tama too iha sala laran, dala ruma afeita sala lima nen bee tama too iha laran,” katak nia.
Aniceto hatutan, horiseik udan boot nee bee nakonu iha areador eskola too agora, bee nee too nain maran deit. Nee duni kada tinan Eskola FINANTIL nee iha bee laran deit, no sai risku ba iha inundasaun iha tempu udan.
“Kada tinan ami nian eskola sai risku ba inundasaun, tanba bainhira udan la para bee tama too ami nian sala laran, no bee nakonu iha sala oin too nain maran deit,” tenik nia.
Nunee mos Diretor ESJ nu. 4 Setembru Balide, Sergio A. da Cruz hatete, eskola ida nee bainhira udan sai risku ba inundasaun, sala ualu parte andar nian okos nee bainhira udan boot nee bee nakonu, no beranda mos nee nakonu.
Jornalista: Jacinta Sequeira
Editora: Domingas Gomes
